Eń aldymen, Qazaqstannyń ár azamatynyń múddesine mán berilgeni erekshe áser etkenin aıtqym keledi. О́zderińiz biletindeı, eldiń ulylyǵy onyń halqynyń ulylyǵynda jatyr. Jeke damýǵa nazardyń dál osylaı baǵyttalýy Qazaqstan Respýblıkasy basshylyǵynyń bul faktini jaqsy túsinetinin kórsetedi. Eger bolashaq urpaqtyń odan ári damýyna negiz bolmasa, progress te bolmas edi. Halyqtyń densaýlyǵyna,bilim alýyna, baqytty ómir súrýine mán berilýi – elderińizdiń úzdiksiz damýyna salynǵan mańyzdy ınvestısııa.
Ekinshiden, árbir azamatqa nazar aýdarýmen ǵana shektelmeı, azamattar men úkimet arasyndaǵy qarym-qatynasty nyǵaıtý da qamtylǵan. Ashyqtyq pen jumylý demokratııalyq qoǵamda sheshýshi ról atqarady. Bul úzdiksiz basqarý kepildigin ǵana emes, sonymen qatar árbir azamattyń óz múddeleriniń úkimette kózdeletinin, óz pikiriniń eskeriletinin bilip, eń bastysy úkimetke senim artýyn qamtamasyz etedi. Osylaısha, árbir adam ult damýy jolyndaǵy birlesken istiń mańyzdylyǵyn sezinedi.
Atap aıtatyn taǵy bir mańyzdy másele, meniń oıymsha Prezıdentterińizdiń zań ústemdigin nyǵaıtýǵa degen nıeti. El Úkimetiniń azamattardyń ǵana emes, Qazaqstanmen áriptestik ornatqysy keletin, qazirdiń ózinde áriptes sheteldik ınvestorlar tarapynan da senimge ıe bolýy úshin qýatty, táýelsiz ári ashyq ınstıtýttar qajet. Sybaılas jemqorlyqqa qarsy qarqyndy kúres osy senimdilikti nyǵaıtýda úlken mańyzǵa ıe.
Sondaı-aq men Qazaqstannyń jahandyq saıasattaǵy róline ekpin berýdiń mańyzdylyǵyn atap aıtqym keledi. Prezıdentterińizdiń Qazaqstandy álemdik saıasatta Reseı, Qytaı jáne Taıaý Shyǵys arasyndaǵy strategııalyq turǵyda ornalasqan jyldam damýshy, beıbitsúıgish el retinde ilgeriletýi úlken úmit beredi. Búginde álemdik qoǵamdastyqqa beıbitshilikke umtylǵan seriktester kerek. Elderińizdiń damýymen birge Qazaqstannyń seriktes, bitimger jáne álemniń promoýteri retindegi róliniń mańyzdylyǵy da óse beretin bolady. Sonymen birge Qazaqstan ózimen kórshi elderden, AQSh pen Eýropadan basqa, ASEAN (Ońtústik Shyǵys Azııa memleketteriniń Assosıasııasy) qurylymynda da yntymaqtasýǵa daıyn seriktesteri bar ekenin de este ustaǵany jón.
Meniń oıymsha, Qazaqstan baı mádenıeti men resýrstaryn jumsaq kúshimen ushtastyra otyryp, qoljetimdi múmkindikterdi paıdalaný arqyly týrızmdi nasıhattaýda úlken jumys isteýge tıis. Men bul aımaqqa úlesimdi qossam deımin.
Sońynda, Qazaqstannyń jaqtasy, kópten bergi jankúıeri retinde osynaý tamasha elderińizdiń damýyna men de eleýli úles qosamyn dep úmittenetinimdi jetkizgim keledi. Prezıdentterińizdiń osy mańyzdy Joldaýynda aıtqan maqsattardyń 2050 jyldan da erterek oryndalaryna kúmánim joq.
Edýardo RAMOS-GOMEZ,
«Duane Morris and Selvam LLP» zań kompanııasynyń áriptesi (Sıngapýr)
