Baqytjan Saǵyntaev arnaıy tehnıkamen jabdyqtalǵan fızıka, bıologııa jáne hımııa kabınetterin aralap, AT-synyptarynda robotty tehnıka jáne tehnıkalyq júıelerdi avtomattandyrý boıynsha oqýshylardyń ázirlemelerimen tanysty.
№ 46 orta mekteptiń dırektory G. Aýǵanbaeva jańa modıfıkasııadaǵy synyptar ınteraktıvti sensorlyq taqtamen, mıkroskoptarmen, hımııalyq tájirıbelerge, bıologııa jumystaryna arnalǵan arnaıy jabdyqtarmen jaraqtandyrylǵanyn aıtty. Fızıka synybyna da kompıýterlik ólsheý qurylǵylary, elektrostatıka, radıotehnıka, mýltımedııalyq nusqaýlyqtar ornatylǵan. AT-synybynda qajetti kompıýterlik tehnıkadan basqa, Robotis Mini gýmanoıdty roboty, robottar jarystaryna arnalǵan alań, «Aqyldy jylyjaı» (Smart Agriculture) Arduino bilim berý jınaǵy, 3D Printer Tarantula jáne basqa jabdyqtar bar. Bilim berý prosesinde tehnologııalardy qoldaný sıfrlyq ekonomıkaǵa bilikti kadrlardy daıarlaýǵa múmkindik beredi.
Memleket basshysy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda «Nazarbaev zııatkerlik mektepteriniń» júıesi men oqytý ádistemesi basqa memlekettik mektepter úshin biryńǵaı standartqa aınalýy tıis» dep atap ótti. Bul mekteptegi bilim berýdi reformalaýdyń sońǵy kezeńi bolmaq.
Shyǵys Qazaqstan oblysy ákimdiginiń derekterine sáıkes, búginde «Nazarbaev zııatkerlik mektebiniń» standarttaryna sáıkes 277 orta mektepti jańa modıfıkasııalaý jáne robotty tehnıka synyptarymen jabdyqtaý jumystary júrgizilip jatyr. 1 qyrkúıekten bastap 277 jalpy bilim berý mektebinde túgeldeı AT-synyptary ashyldy.
О́z kezeginde oblys ákiminiń orynbasary A. Núsipova Elbasy alǵa qoıǵan mindetterdi eskere otyryp, bilim berý sapasyn arttyrý boıynsha qabyldanyp jatqan sharalar týraly baıandady. Máselen, mektepterde kedergisiz ınternetke kirýge múmkindik bar, barlyq mektepter «Kúndelik» elektrondy jýrnaly men kúndelikter júıesine qosylǵan. Oblysta barlyǵy 187 245 bala bilim alatyn 691 orta mektep jumys isteıdi. 70% mektep synyptary kompıýterlik jáne mýltımedııalyq jabdyqtarmen qamtylǵan.
Aıta ketý kerek, Prezıdent Joldaýyn iske asyrý aıasynda bilim berý jáne densaýlyq saqtaý salalarynda tıimdilikti arttyrýǵa basymdyq bere otyryp, atalǵan salalardy memlekettik qoldaýdy arttyrý jumystary júrgizilip jatyr. Elbasy bes jyl ishinde bilim, ǵylym, densaýlyq saqtaý salalaryna barlyq kózderden jumsalatyn qarajatty jalpy ishki ónimniń 7,4%-dan 10%-ǵa deıin jetkizý týraly mindet qoıdy. Úsh jyldyq bıýdjet aıasynda bilimge jumsalatyn shyǵyndardy bıyl 456,3 mlrd teńgeden 2021 jyly 752,1 mlrd teńgege deıin nemese 65%-ǵa arttyrý kózdelgen.
Bıyl Shyǵys Qazaqstan oblysynyń densaýlyq saqtaý júıesin qarjylandyrýǵa 16,5 mlrd teńge qarastyrylǵan. Densaýlyq saqtaý nysandaryn damytýǵa 9,4 mlrd teńge (sonyń ishinde RB-ten — 1,2 mlrd tg), materıaldyq-tehnıkalyq bazany nyǵaıtýǵa — 3,6 mlrd tg, kúrdeli jóndeý jumystaryna — 0,3 mlrd tg qarastyrylǵan.
