Jıyndy Qazaqstan Respýblıkasynyń Tuńǵysh Prezıdenti – Elbasy kitaphanasy, Qazaqstan Respýblıkasynyń Tuńǵysh Prezıdenti qory, EQYU-nyń Astanadaǵy Baǵdarlamalar ofısi Syrtqy ister mınıstrliginiń qoldaýymen uıymdastyrdy.
Konferensııanyń maqsaty – eki jaqty yntymaqtastyqtyń 20 jyldyǵyna oraı jahandyq álemdegi EQYU-nyń rólin jáne onyń Qazaqstan Respýblıkasymen ózara yqpaldastyǵy máselelerin talqylaý.
Is-sharaǵa, sondaı-aq EQYU bas hatshysy T.Gremınger, Syrtqy ister mınıstri Q.Ábdirahmanov, Prezıdent Keńsesiniń bastyǵy M.Qasymbekov, Parlament depýtattary, memlekettik organdardyń, dıplomatııalyq mıssııanyń, ǵylymı-saraptamalyq qoǵamdastyqtyń, joǵary oqý oryndarynyń, azamattyq qoǵamnyń ókilderi qatysty.
Basqosýdy ashqan Gúlshara Ábdiqalyqova konferensııaǵa qatysýshylarǵa Memleket basshysy N.Nazarbaevtyń quttyqtaý sózin oqyp berdi. Onda: «2010 jyly osy bedeldi uıymdy basqarǵan jáne búginde onyń jumysyna belsendi atsalysyp kele jatqan memleket retinde biz úshin bul oqıǵanyń mańyzy zor. EQYU-ǵa tóraǵalyǵymyz óńirlik jáne halyqaralyq qaýipsizdikti qamtamasyz etý isine úles qosýǵa, Uıymdy basqarý úshin senimge, sabaqtastyqqa, ashyqtyq pen tózimdilikke negizdelgen jaýapty kózqaras tanytýǵa múmkindik berdi. Qazirgi kezeńdegi halyqaralyq qatynastar transformasııasy jaǵdaıynda EQYU qaýipsizdiktiń jańa arhıtektýrasynyń negizgi elementiniń biri bolyp qala beretini aıtylǵan».
Qazaqstannyń EQYU-men yntymaqtastyǵy qyzmettiń áskerı-saıası, ekonomıka-ekologııalyq, gýmanıtarlyq sııaqty úsh ólshemine sáıkes júrgizilip keledi jáne Uıymnyń ortalyq ınstıtýttarymen qatar, onyń óńirdegi mıssııasy – EQYU-nyń Astanadaǵy Baǵdarlamalar ofısimen ózara yqpaldastyqta júzege asyrylady.
EQYU-nyń Astana Sammıtiniń murasyn damytý Qazaqstannyń Uıymdaǵy aldaǵy jyldarda atqaratyn qyzmetiniń negizgi ózegi bolyp qala bermek.
