Biz, VI sezdiń qatysýshylary – barsha adamzattyń gúldenýi jolynda beıbitshilikke, kelisimge jáne jasampaz yntymaqtastyqqa biryńǵaı umtylyspen birikken álemdik jáne dástúrli dinderdiń ókilderi, memleket basshylary, halyqaralyq uıymdardyń basshylary, Qazaqstan Respýblıkasynyń Prezıdenti, Joǵary Mártebeli Nursultan Nazarbaev myrzaǵa bizdiń halyqtarymyz ben memleketterimiz arasyndaǵy beıbitshilik pen kelisimge, dıalog pen qaýipsizdikke qol jetkizý úderisine teńdessiz úlesi úshin sheksiz rızashylyǵymyz ben alǵysymyzdy bildire otyryp, barsha Qazaqstan halqyna jáne onyń Úkimetine olardyń kishipeıildiligi men qonaqjaılylyǵyna ózimizdiń sheksiz qoshemetimiz ben qurmetimizdi kýálandyra otyryp, bolashaq urpaq úshin janjalsyz keleshek qurý jolynda órkenıetter men dinder arasyndaǵy bitimgerlik dıalogty damytý men alǵa jyljytýdaǵy Qazaqstan Respýblıkasynyń biregeı úlesin moıyndaı otyryp, órkenıetaralyq jáne dinaralyq dıalogty damytý men nyǵaıtý úshin Álemdik jáne dástúrli dinder lıderleri seziniń irgeli rólin biregeı jahandyq platforma retinde qoshemetteı otyryp, Álemdik jáne dástúrli dinder lıderleriniń bes Seziniń nátıjesi boıynsha aıtylǵan aldyńǵy Málimdemelerdiń rýhyna adal bola otyryp, planetamyzdyń dinı jáne mádenı ár alýandyǵyn adamzat órkenıetiniń uly murasy retinde saqtaýdyń mańyzdylyǵyn rastaı otyryp, Álemdik jáne dástúrli dinder lıderleriniń dıalog pen pozıtıvti gýmanıstik qundylyqtardy nasıhattaý arqyly halyqtar men memleketterdiń beıbit qatar ómir súrýin ilgeriletýge múddeli memlekettik jáne qoǵamdyq ınstıtýttarmen yntymaqtastyǵynyń mańyzdylyǵyn atap kórsete otyryp, memleketter, qoǵam jáne halyqtar arasyndaǵy beıbitshilik pen ózara túsinistik ıdeıalaryn ilgeriletý men nasıhattaý salasyndaǵy úkimetterdiń, sondaı-aq úkimettik jáne úkimettik emes, ulttyq jáne halyqaralyq uıymdardyń, buqaralyq aqparat quraldarynyń aıryqsha rólin belgileı otyryp, álemdik órkenıettiń ámbebap tiregi bolatyn kópkonfessııalyq qoǵamnyń beıbit qatar ómir súrýi men ózara is-qımylynyń biregeı tarıhı úlgilerine súıene otyryp, dinı, etnostyq, mádenı jáne lıngvıstıkalyq aıyrmashylyq negizindegi shettetýdi, tózimsizdikti, kemsitýshilikti, janjaldardy jáne qaıshylyqtardy eńserý jolyndaǵy yntymaqtastyqtyń rýhanı baǵdarynan taımaýdyń mańyzdylyǵyna aıryqsha mán bere otyryp, ıgi isterdiń, qaıyrymdylyqqa qyzmet etýdiń, beıbitshilik pen ádildik ıdeıalaryna berilgendiktiń halyqtar men memleketterge áskerı teketiresterge qaraǵanda áldeqaıda kóp paıda ákelýi múmkin ekenin túsine otyryp, planetanyń túrli óńirlerindegi áskerı janjaldar men naqaq qantógisterdi shuǵyl retteýge jáne túbegeıli sheshýge baǵyttalǵan saıası lıderlerdiń jigerin qoldaı otyryp, halyqaralyq terrorıstik uıymdar tarapynan jalǵasyp otyrǵan dóreki, júıeli jáne adam quqyqtaryna jappaı nuqsan keltirý men halyqaralyq gýmanıtarlyq quqyq normalaryn buzýdy jáne/nemese túrli dinderge senýshiler arasyndaǵy jáne sol bir senimge nanýshylar arasyndaǵy ózara senim men ózara is-qımyldy buzatyn terrorızmge qoldaý kórsetýdi barynsha qatań túrde synǵa ala otyryp, dindi saıası janjaldarda ártúrli teris paıdalanýdan, ózimshildik pen tózimsizdik bildirýden, agressııashyl ultshyldyqtan jáne erekshelenýge umtylýdan bas tarta otyryp, sheteldik jaýynger-terrorısterdiń oralý jáne oryn aýystyrý problemalaryn barlyq memleketterdiń halyqaralyq terrorızmmen jáne dinı ekstremızmmen kúresindegi kelesi jahandyq qater retinde eskere otyryp, joǵary etıka normalarynyń ústemdik qurýyna, umtylystarymyzdyń ortaqtyǵyna, turaqtylyq, barlyq adamdardyń salamattylyǵy, qaýipsizdigi maqsatynda ózara senim men ózara qurmet kórsetýge beıildilikti rastaı otyryp, Álemdik jáne dástúrli dinder lıderleri seziniń Qazaqstan Respýblıkasynyń elordasy Astana qalasynda shaqyrylýyn jalǵastyrý nıetin qoldaı otyryp,
MYNALARǴA:
1) álemdik jáne dástúrli dinder lıderleriniń uzaq merzimdi turaqtylyqqa qol jetkizý jáne óshpendilik pen tózbeýshilikten týyndaıtyn zorlyq-zombylyq oqıǵalaryn bolǵyzbaý jónindegi asa belsendi kúsh-jiger salýǵa tartylýyna barynsha járdemdesýge,
2) álemdegi qaýipsizdikti tolyq formatty qamtamasyz etýge baǵyttalǵan ómirlik mańyzy bar usynymdar men baǵdarlamalardy tabysty júzege asyrý úshin negizgi ıdeıa retinde dinı lıderlerdiń halyqaralyq ınstıtýttarmen, úkimettermen jáne qoǵamdyq ınstıtýttarmen yntymaqtastyǵyn nyǵaıtýǵa,
3) násiline, dinine, nanymyna, tiline jáne jynysyna qaramastan, barlyq qoǵamdar men halyqtarǵa beıbit ómirge ajyramas quqyqty ıelenýge barynsha járdemdesýge,
4) násildik, tildik, dinı, ulttyq, etnostyq nemese áleýmettik shyǵý tegine, múliktik, jiktik nemese ózge de jaǵdaıyna qaramastan, barlyq azamattardyń teń quqyqtary men bostandyqtaryn qurmetteýge jáne bir-birimizben baýyrlastyq rýhyndaǵy qarym-qatynasta bolýǵa,
5) halyqaralyq qoǵamdastyqtyń ádil jáne tartyssyz álemdik ahýaldy qurý jónindegi qyzmetiniń negizgi ári ajyramas baǵyttarynyń biri retinde dinaralyq jáne konfessııaaralyq dıalogty nyǵaıtý salasyndaǵy kúsh-jigerdi taný jónindegi bastamalardy qoldaýǵa,
6) ekstremıster men terrorıster tarapynan quqyqtaryna shekteý qoıylǵan jáne zorlyq-zombylyqqa ushyraǵan barlyq dinı toptar men etnostyq qaýymdarǵa nıettestik bildirýge,
7) bosqyndardy, olardyń quqyqtary men ar-namysyn qorǵaýǵa baǵyttalǵan kúsh-jigerge qoldaý kórsetýge, sondaı-aq olarǵa barlyq qajetti kómekti kórsetýge,
8) saıası qaıratkerlerdi jáne álemdik BAQ-ty terrorızmdi dinmen teńdestirý praktıkasyn toqtatýǵa shaqyrýǵa, óıtkeni bul ıdeıalar bizdiń dinderimizdiń bolmysyna jáne olardyń beıbit qatar ómir súrýine zııan keltiredi, bir ǵana dinge jáne ártúrli dinderge erýshiler arasyndaǵy ózara senim men ózara is-qımylǵa zalal keltiredi,
9) álemdik qoǵamdastyqtyń progressıvti bóliginiń qoǵamdy dinı, násildik ne etnostyq qaǵıdattar boıynsha bólý áreketteriniń jolyn kesý jónindegi kúsh-jigerin qoldaýǵa,
10) dinı lıderlerdi BAQ-ta, áleýmettik jelilerde jáne qoǵamdyq jınalystarda beıbitshilik, ózara túsinistik jáne toleranttyq qundylyqtaryn ilgeriletýge shaqyrýǵa, sondaı-aq barlyq dinder úshin qasıetti jerlerde arandatýshylyqtardy jáne zorlyq-zombylyqty bolǵyzbaý jónindegi barlyq kúsh-jigerdi salýǵa,
11) barlyq dinderdiń qulshylyq etý oryndarynda jáne qasıetti jerlerde, onyń ishinde barlyq avraamdyq dinder ókilderi úshin qasıetti jer sanalatyn Ierýsalımde arandatýlardy jáne zorlyq-zombylyqty boldyrmaý úshin búkil kúsh-jigerdi salýǵa,
12) órkenıetaralyq dinaralyq jáne mádenıetaralyq dıalogty ádil, beıbit ári jaýapty azamattyq qoǵamdy qurýdyń eń jaqsy tásili retinde qarastyratyn bastamalar men ınstıtýttardy ilgeriletýge,
13) Qazaqstan Respýblıkasy Tuńǵysh Prezıdentiniń beıbitshilik pen kelisim jolyndaǵy jahandyq ózara is-qımyl prosesine qosqan aıryqsha úlesin tanýdyń belgisi retinde «Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵyn» qurýdy qoldaýǵa,
14) terrorıstik jáne ekstremıstik uıymdardyń ıdeologııalaryn taratý úshin negiz retinde dinı ilimderdi bólshekteýdi jáne dinı qundylyqtardy dıffamasııalaýdy teriske shyǵarýǵa,
15) álem qurylysynyń, ártúrli dinderdi ustanýshylar arasyndaǵy ózara túsinistikti nyǵaıtýdyń, álemdik jáne dástúrli dinder arasynda bolyp turatyn shıelenisterdi sheshýdiń dástúrlerin kótermeleýge jáne olardy is júzinde qoldanýǵa,
16) óz dinimizdiń ókilderi arasynda barlyq konfessııa ókilderimen beıbit qatar ómir súrýdiń qajettiligi men mańyzdylyǵy týraly ıdeıany ilgeriletýge,
17) ońaltý jáne deradıkalızasııalaý baǵdarlamalary sheńberinde óz elderine qaıta oralǵan sheteldik sodyr terrorısterge qatysty tıimdi sharalar ázirleýge járdemdesýge jáne qatysýǵa,
18) ulttyq, dinı jáne halyqaralyq deńgeılerde dinaralyq dıalogty, ózara qurmetpen qaraýdy jáne úılesimdi nyǵaıta túsýge yqpal etýge,
19) adam men adamnyń qatar ómir súrýiniń eń mańyzdy negizi retinde ártúrli órkenıetter men dinderdiń jaqyndasýyna yqpal etýge,
20) memleketterge jáne saıası lıderlerge dinı ekstremızmniń jáne halyqaralyq terrorızmniń týyndaýynyń qaınar kózderi men negizgi sebepterin taldaýda jáne zertteýde járdem kórsetýge,
21) jastardyń radıkalızmge bet burýyn bolǵyzbaý maqsatynda úkimetterdi olarmen jumys júrgizýdi jandandyrýǵa shaqyrýǵa,
22) bedeldi dinı lıderlerdiń sózderi ǵana «din pikiri» retinde qabyldanatyndaı pozısııany anyq ustanýǵa,
23) Álemdik jáne dástúrli dinder lıderleriniń VII sezin 2021 jyly Qazaqstan Respýblıkasy, Astana qalasynda ótkizýge
ÁZIR EKENDIGIMIZ JО́NINDE MÁLIMDEIMIZ.
Biz barsha adal nıeti men senimi bar adamdardy osyndaı kúrdeli kezeńde birigýge jáne ǵalamsharymyzda beıbitshilik pen kelisimdi qamtamasyz etýge óziniń jaýapkershilik úlesin qosýǵa shaqyramyz.
Qazaqstan Respýblıkasy, Astana qalasy,
2018 jylǵy 11 qazan
