Bul jolǵy Joldaý, pedagogter qaýymyn tól merekeleri qarsańynda erekshe qýanyshqa bóledi. О́ıtkeni mańyzdy qujatta Memleket basshysy «Pedagog mártebesi týraly» zańdy ázirlep, qabyldaý qajettigin tapsyrdy. Bul qujat muǵalimder men mektepke deıingi mekemelerdiń qyzmetkerlerin qanattandyryp, óz mamandyǵyna degen súıispenshiligin arttyra túsetini anyq. Pedagog – oqytýshy ǵana emes, ult tárbıeshisi. Sol sebepti, qoǵamnyń aýyr da, jaýapty júgin arqalaǵan muǵalimder úlken qurmetke laıyq.
Jalpy, oblysymyzdy pedagogterdiń mártebesin arttyrý, qoldaýdy maqsat etken kóptegen ıgi jumystar atqarylyp jatyr. Sonyń biri – jyl saıyn oblystyq, respýblıkalyq deńgeıde uıymdastyrylyp jatqan «Úzdik pedagog» baıqaýy. Bul baıqaýdyń muǵalimder úshin paıdasy zor. Jaqynda ǵana «Úzdik pedagog-2018» respýblıkalyq baıqaýynyń qorytyndysy shyǵyp, nátıjesinde jeńimpaz atandym. Men úshin – úlken mártebe, zor jetistik. Bul tek qana meniń mereıimdi ústem etken joq, men jumys isteıtin M.Qusaıynov atyndaǵy oblystyq mektep-ınternattyń, oblystyń abyroıy.
Elbasy Joldaýynda Nazarbaev zııatkerlik mektepteriniń bilim berý ádistemesi memlekettik mektepter úshin biryńǵaı standartqa aınalýy tıis ekenin atap kórsetti. Osyǵan oraı mektepterdegi hımııa, bıologııa, fızıka, ınformatıka pánderiniń muǵalimderi aǵylshyn tili kýrstaryn támamdap, nátıjesinde qazir olar halyqaralyq talaptarǵa saı baǵdarlamalar negizinde pánderin úsh tilde júrgizip jatyr. Osylaısha elimizdiń mektepteri kezeń-kezeńmen Memleket basshysy júktegen jańartylǵan bilim mazmunyna kóshetin bolady.
Bala – elimizdiń erteńi, bizdiń bolashaǵymyz. Olarǵa kásibı baǵdar berýimiz qajet. Jalpy, orta mektepterge kásibı dıagnostıka jasap, tapshy mamandyqtardy aıtyp, balalarǵa baǵyt kórsetýimiz kerek. Mektepte oqýshylardyń fýnksıonaldyq saýattylyqtaryn qalyptastyryp, alǵan bilimderin ómirde qoldana biletin jańashyl, synı, jaqsy oılaı alatyn tulǵa qalyptastyrýymyz qajet. Bul da Memleket basshysy júktegen mindet.
Elbasy tapsyrmasymen qolǵa alynǵan «Rýhanı jańǵyrý» baǵdarlamasy ulttyq qundylyqtardy ulyqtaýǵa negizdelgen. Olaı bolsa, jańartylǵan bilim berý baǵdarlamasynyń negizgi ıdeıasy – osy ulttyq qundylyqtarǵa baǵyttalǵan.
Gúlnaz MYŃJASAROVA,
«Úzdik pedagog-2018» respýblıkalyq baıqaýynyń jeńimpazy
AQTО́BE
