Dárigerdi demegeni jaýapkershilikti arttyrady

Tuńǵysh Prezıdentimizdiń bı­ylǵy Qazaqstan halqyna arna­ǵan Joldaýyn Qaraǵandy qala­syn­daǵy №4 emhananyń ujymymen birge men de den qoıyp tyńdadym. Álbette, maǵan Elbasynyń densaý­lyq saqtaý salasyna qatysty aıtqan sózderi aıryqsha áser etti. О́z basym muny medısına qyzmetkerlerine kórsetilgen qoldaý, sonymen birge artar jaýapkershiligi mol qadam dep qabyldadym.

Prezıdent Joldaýda «2019 jyldyń 1 qańtarynan bastap bar­lyq emhanalar men aýrýhana­lar medısınalyq qujattardy qaǵaz­syz, sıfrly nusqada júrgizýge kóshýge tıis. Bul 2020 jylǵa qaraı búkil turǵyndardyń elektrondy densaýlyq pasporttaryn jasaýǵa, kezekterdi, bıýrokratııany joıýǵa, qyzmet kórsetý sapasyn arttyrýǵa múmkindik beredi», dedi.

Jalpy, Qaraǵandy oblysynda sıfrlandyrý jumystary osydan eki jyl buryn qanatqaqty nusqa retinde qolǵa alyna bastaǵanyn maq­ta­nyshpen aıtqym keledi. Sıfrlan­dyrýdyń bir jaqsy jeri, naýqas aldyńyzǵa kelgende, ol týraly de­rek­­tiń barlyǵy da kóz aldyńyzda saı­­rap turady. Munyń ózi naýqasqa kórsetiler qa­jetti em-domdy ýaqyt­ty sozyp almaı, der kezinde sapaly túrde jasaý­­ǵa septigin tıgizedi. My­sa­ly, bu­ryn bir naýqasqa dáriger jarty saǵat ýaqytyn jumsasa, qazir em-dom kór­­setýdiń ýaqyty eki esege qys­qar­dy. Sonymen qatar naýqas týra­ly derekter bir bazaǵa engizilip, orta­lyq­tan­dyrylǵan. Mysaly, bizge qara­lyp júrgen naýqas basqa qalada issapar­men júrip em qabyldaıtyn bolsa, onyń ­eg­jeı-tegjeıinen biz or­ta­lyq­tandyryl­ǵan júıe ­arqy­­ly ­sol zamatta habardar bolyp ­otyramyz. 

Meniń ózim qazirgi ýaqytta Qaraǵandy qalasyndaǵy №4 emhanada oftalmolog, ıaǵnı kóz dárigeri bolyp jumys isteımin. Balalar men eresekterdi qatar emdeımin, buǵan ruqsat beretin arnaıy sertıfıkatym bar. Búgingi ýaqytta bizdiń emhanada bıýrokratııalyq kedergilerdi joıý, sybaılas jemqorlyqtyń aldyn alý sııaqty mańyzdy sharalar boıynsha jumystar belsendi túrde júrgizilip jatyr. Máselen, dárigerlerdiń bólmesi dybys jazý, beınetaspaǵa túsirý quraldarymen jabdyqtalǵan. Iаǵnı, naýqas pen dáriger arasyndaǵy áńgime ashyq formatta júrgiziledi. Sonymen qatar saıtymyz turaqty jumys isteıdi, áleýmettik jelilerdi de belsendi túrde qoldanamyz. Bári de ashyq túrde: kez kelgen naýqas dárigerdiń qyzmetine kóńili tolmasa, aryz-shaǵymyn ınternet jelisi arqyly joǵary jaqqa kedergisiz jetkize alady. Jasyratyny joq, munyń ózi bizdiń jumysymyzǵa jaýap­kershilikpen qarap, jınaqy jú­rýimizge, biliktiligimizdi únemi je­til­dirip, qyzmet sapasyn arttyryp otyrýymyzǵa óte qatty yqpal etedi.

Negizi, Prezıdent Joldaýyn­­­daǵy 2019 jyldyń 1 qańta­rynan bastap medısına qyzmet­kerleri­niń eńbekaqysyn kóterý jónin­degi málimdemeni qýana qabyldaǵa­ny­myz­dy jasyrmaımyz. Degenmen, biz úshin aldymyzǵa kómek surap kelgen naýqastardyń, jalpy turǵyndardyń densaýlyǵy eń birinshi kezekte ma­ńyz­dy ekendigin basa aıtqym keledi.

Aıdos OMAROV,

№4 qalalyq emhananyń oftalmolog dárigeri 

QARAǴANDY