Jańa Joldaýdyń eldiń áleýmettik áleýetin arttyrýdan bólek, rýhanı mazmuny da tereń. Tarıhı qujattyń júıeli júzege asýyna, qoǵamdyq oı-pikir qozǵaýda qalamgerler qaýymy da qalys qalmaı, belsendilik tanytpaq. Elbasy óz Joldaýynda aldaǵy jyldy «Jastar jyly» dep jarııalaǵany belgili. Osyǵan oraı Jazýshylar odaǵy jastar shyǵarmashylyǵyn jan-jaqty damytýǵa arnalǵan arnaıy baǵdarlama ázirlemek. Jobada jastar poezııasy men prozasyn damytý, dramatýrgııa men syn janryna sony serpin berý basty baǵyttardyń biri bolmaq.
Qazaqstan Jazýshylar odaǵy basqarma tóraǵasynyń orynbasary aqyn Baýyrjan Jaqyp: «Memleket basshysy sóz basynda elimizdiń san salada qol jetkizgen eleýli jetistikterin túıip-túıip aıtyp ótti. Rasynda kóńil qýantarlyq jetistikter kóp-aq. Elbasy keler jyldyń qańtarynan bastap eń tómengi jalaqy mólsheri 1 jarym esege, ıaǵnı 28 myńnan 42 myń teńgege deıin ósetindigin aıtty. Sonymen qatar 3 jyldyń ishinde óńdeý ónerkásibi men shıkizattyq emes eksportty qoldaýǵa 500 mıllıard teńge basymdyǵy bar jobalarǵa qoljetimdi nesıe berý úshin Ulttyq bankten keminde 600 mıllıard kóleminde uzaq merzimge qarjy bólý isi tapsyryldy. Munyń bári halyqqa jasalyp otyrǵan úlken qoldaý. Ásirese pedagogtiń mártebesi týraly zań qabyldaý máselesi óte ońdy dúnıe. «Alash balasynyń basy qosylsa, tór muǵalimdiki» deıtin Maǵjan sóziniń básiresin bıiktetip, ustazdarymyzdyń mártebesin ósirý – ulttyń bolashaǵy úshin jasalǵan ıgi qadam», dedi.
Basqosý barysynda zııaly qaýym jazýshylardyń qoǵamdaǵy róli, jastar ádebıetin qoldaý, Joldaýdy iske asyrýda qalamgerler qaýymyna artylǵan jaýapkershilik turǵysynda áńgime órbitip, óz usynystaryn ortaǵa saldy.
– Kez kelgen Joldaý jazýshylarǵa tikeleı qatysty. О́ıtkeni «Rýhanı jańǵyrý» baǵdarlamasyna baılanysty barlyq jumystarǵa Qazaqstan Jazýshylar odaǵy tikeleı qatysady dep Elbasy qadap aıtqan bolatyn. Bul qalamgerler úshin úlken mártebe ári zor múmkindik. Joldaýdy jazýshylar qyzý talqylady. Kelesi jyl jastar jyly bolatyny úlken jańalyq bolyp jatyr. О́ıtkeni bizdiń jazýshylarymyz únemi keıingi tolqynmen tolyǵyp, ádebıetke tolqyn-tolqyn jastar kelip otyrýy kerek, – deıdi jazýshy-drammatýrg Sultanáli Balǵabaev.
Budan bólek belgili jazýshylar Maral Ysqaqbaı men Ahmetjan Ashırı, aqyn Lıýbov Shashkova men ǵalym Temirhan Tebegenov sóz alyp, halyqqa sapaly áleýmettik qyzmet kórsetý, bilim men medısına salasyn damytý, halyq tabysynyń ósýi syndy Joldaýda qamtylǵan birqatar taqyryptarǵa qatysty óz oı-pikirlerin bildirdi.
Arman OKTIаBR,
«Egemen Qazaqstan»
ALMATY
