Oblys ákimi Eraly Toǵjanov Joldaýdaǵy birinshi basymdyq halyq tabysynyń ósýi ekenin atap ótti. 28 myń bıýdjet qyzmetkeriniń eńbekaqysy orta eseppen 35% - ke ósedi. Sonymen qatar múmkindigi shekteýli 25 000 adam úshin tólem mólsheri ulǵaıtylatyn bolady. Sondyqtan óńir basshysy barlyq bıýdjettik mekemelerge, jalaqyny kóterý týraly esepti ekonomıka jáne bıýdjettik josparlaý basqarmasyna dereý usynýdy, sondaı-aq básekelestikti damytý jáne monopolıstik kompanııalardyń tarıfterin retteý máselesi boıynsha monopolıster men PIK-ke tekserý júrgizýdi tapsyrdy.
– Elbasy shaǵyn jáne orta bıznes úshin salyq amnıstııasyn júrgizýge tapsyrma berdi. Bul – ósimaqylar men aıyppuldardy esepten shyǵarý degen sóz. Tek adal salyq tóleýshiler úshin amnıstııa jarııalanady. Memlekettik kirister departamentiniń derekteri boıynsha, shamamen 600 shaǵyn jáne orta bıznes sýbektisi amnıstııany qoldana alady, – dedi E.Toǵjanov.
Agroónerkásiptik sektordy damytýǵa memleket bólgen qarajat birinshi kezekte óńirdi jergilikti aýyl sharýashylyǵy ónimderimen qamtamasyz etý kórsetkishin arttyrýǵa jol ashpaq. Bul úshin aımaqtaǵy aýyl sharýashylyǵy basqarmasy qajetti qarajatty oblysqa bólý boıynsha mınıstrlikpen tıisti jumystar júrgizýi qajet.
Memleket basshysy ınnovasııany damytýǵa erekshe nazar aýdarýdy tapsyrǵan bolatyn. Iаǵnı, eń aldymen balamaly energetıkany, jańa materıaldardy, bıomedısınany jáne basqa da baǵyttardy ilgeriletýdi qamtamasyz etý qajet. Bul baǵytta aımaqta Batyr aýylynda qýaty 2 Mvt kún elektr stansasy paıdalanýǵa berilip, Mańǵystaý jáne Túpqaraǵan aýdandarynda jel jáne kún elektr stansalarynyń qurylysy júrgizilýde. Sondaı-aq munaı kompanııalary ınnovasııalyq jobalar boıynsha úlken jumystardy qolǵa alýda.
Aımaq basshysynyń aıtýynsha, Mańǵystaý oblysy «7-20-25» baǵdarlamasymen qoldanysqa berilgen páterler boıynsha kósh basynda.
Oblysta 3 jastan 6 jasqa deıingi balalardy mektepke deıingi bilimmen qamtý 93,7% (2017 jyly 93,1%) quraıdy. Jyl basynan 919 oryndyq 10 balabaqsha paıdalanýǵa berildi. Jyl sońyna deıin taǵy 23 nysan paıdalanýǵa beriledi. Nátıjesinde kórsetkish 97,1%-ke jetpek. Sondaı-aq medısınalyq qyzmet kórsetý sapasyn arttyrý máselesin sheshý úshin óńirde 1219 medısına qyzmetkeri jalaqyǵa ústemaqy alady. Medısına salasyn sıfrlandyrýǵa da erekshe kóńil bólinýde.
Búginde Mańǵystaý halqynyń buqaralyq sport túrlerimen jáne dene shynyqtyrýymen qamtylýy 29,6%-ti quraıdy, bul sońǵy 3 jylmen salystyrǵanda 8 esege kóp.
– Memleket basshysynyń tapsyrmasyna sáıkes biz aımaqtyq deńgeıde rezervter taýyp, oblys turǵyndary úshin sportty qoljetimdi etýge tıispiz. Sondaı-aq sońǵy jylda 20-dan astam sport alańy men 11 iri sport nysany jeke ınvestorlar esebinen salyndy. Bıyl Aqtaý qalasynda muz aıdynynyń, Boks ortalyǵynyń, Beıneý, Mańǵystaý jáne Senek aýyldarynda sport keshenderiniń qurylysy bastaldy. Bıylǵy jyly Mańǵystaýda fýtboldy damytý maqsatynda jańa fýtbol alańy salynyp, «Munaıshy» stadıony qaıta jóndeýden ótti, – dedi óńir basshysy.
О́mir súrýdiń qolaıly ortasyn qurý máselesi boıynsha Prezıdent halyqqa Joldaýynda óńirlik jáne qalalyq ınfraqurylymdy damytýǵa erekshe nazar aýdardy. Osylaısha, jyl sońyna qaraı Mańǵystaý aýyldyq eldi mekenderiniń 69%-i nemese aýyl halqynyń 89%-i ortalyqtandyrylǵan aýyz sýmen qamtamasyz etiledi. Qazirgi ýaqytta aýdanaralyq joldardyń kópshiliginiń jaǵdaıy jaqsy, sondyqtan aýylishilik joldardyń qurylysyna qarajat bólinetin bolady.
Elbasy Joldaýyn iske asyrýdyń basqa da aspektilerin qoldaný týraly oılarymen qoǵam belsendileri bólisti. Týrıstik klasterdiń ókili, demalys bazasynyń dırektory U.Ahmetova «Bıylǵy jazda Mańǵystaýǵa sapary kezinde, Prezıdent Aqtaý qalasy Túrik Antalııasyna balama bolýy tıis degen tapsyrma berdi. Búginde Úkimet deńgeıinde «Kaspıı teńizi jaǵalaýyndaǵy teńiz kýrortyn damytý jónindegi jol kartasy» qabyldandy, onyń negizgi baǵyty Aqtaý qalasynan Quryq kentine deıingi jaǵajaı aımaǵynyń ınjenerlik ınfraqurylymyn salý», dep atap ótti.
Basqosýda «Aqtaý – taza qala» JShS dırektory S.Parfenov, Aqtaý qalasyndaǵy Nazarbaev Zııatkerlik mektepteri pedagogıkalyq sheberlik ortalyǵynyń dırektory Q.Boranbaeva, bilim salasynyń ardageri T.Turǵambaev, ózge de birqatar azamattar pikir bildirip, Joldaýdy ár salada júzege asyrý boıynsha oı-pikirlerin ortaǵa saldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
