Sapar barysynda Tóraǵanyń birinshi orynbasary qolbasshy, aqyn, áz-Táýkeniń senimdi serikteriniń biri, ataqty «Elim-aı» dastanynynyń avtory Qojabergen jyraý Tolybaıulyna arnalǵan eńseli eskertkishtiń ashylý rásimine qatysty. Mańyzy zor jıynda sóılegen sózinde ol Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda mádenı, rýhanı qundylyqtarymyzdy qasterleý, ulttyq kodymyzdy jańǵyrtý, sana-sezimimizdi taptaýryn qaǵıdalardan aryltý baǵytynda aýqymdy jumystar atqarylǵanyn, erligi men órligi , aqylgóıligi men parasattylyǵy, ómiri men shyǵarmashylyǵy jas urpaq úshin úlgi-ónege tulǵany ulyqtaý ıgilikti sharalardyń zańdy jalǵasy bolyp tabylatynyn, atyn ardaqtap, rýhyna taǵzym etý qasıetti boryshymyz ekenin atap kórsetti. Aımaq basshysy Qumar Aqsaqalov bir boıyna batyrlyq, qolbasshylyq, aqyndyq, sazgerlik, kúıshilik, kóregendik asyl qasıetterdi toǵystyrǵan babamyzdyń baı murasyn tereń zerttep, nasıhattaý bolashaq urpaq aldyndaǵy basty paryz bolý tıistiligin jetkizdi.
Budan keıin M. Áshimbaev 90 jyldyq tarıhy bar S. Kırov atyndaǵy zaýyttyń ujymymen kezdesip, óndiristi jańǵyrtý, ozyq tehnologııalardy engizý barysymen tanysty. Bir kezderi «Medeý» magnıtolasyn, sondaı-aq túrli radıoqurylǵylar shyǵaryp, ataǵy shartarapqa tanylǵan kásiporynnyń qazirgi aıaqalysy naryq talaptarymen úndes. Bastapqyda gaz ben elektr energııasyn eseptegish quraldary, tok transformatorlary,elektrqozǵaltqysh qorǵaý qondyrǵylary, avtomobıl nasostary men kótergishter, tájirıbe jınaqtaı kele 3D prınterlerin, besinshi dárejeli baspa platalaryn, sandyq televızııa jáne uıaly baılanys keshenderin óndire bastady. Tóraǵanyń birinshi orynbasary jumysshy-qyzmetkerlerdiń nazaryn Joldaýdyń negizgi baǵyttarynyń biri ekonomıkanyń ınnovasııalyq jáne qyzmet kórsetý sektoryn damytý máselesine aýdardy. Sizder ınnovasııalyq belsendilik jaǵynan alda ekensizder.Munyń ózi jumystyń tıimdi uıymdastyrylǵanyn kórsetedi, dedi.
Elbasy talaptarynyń biri halyq tutynatyn taýarlardyń aýqymdy nomenklatýrasyn ıgerip, «qarapaıym zattar ekonomıkasyn» damytý úshin kásiporyndarǵa kómektesý mańyzdy. Bul ıdeıany «Radýga» JShS-i tabysty júzege asyryp keledi. Kásipker Dmıtrıı Sharapaev «Bıznestiń jol kartasy–2020» memlekettik baǵdarlamasy boıynsha eki mıllıard teńge sýbsıdııa rásimdep, qurǵaq tańǵy as, júgeri taıaqshalary, tez daıyndalatyn kespe, plastık ydys-aıaqtar, ne kerek, taýarlar men taǵamdardyń 500- den astam túri shyǵarylady. 400 adam turaqty jumyspen qamtamasyz etilgen. Ishki suranystan artylǵany Reseı men Qytaıǵa jóneltiledi. Aldaǵy ýaqytta quny 10 mıllıard teńge bolatyn tórt ozyq joba ıgerilmek. Nátıjesinde júzdegen jumys oryndary qurylady. Máýlen Saǵathanuly «Bıznestiń jol kartasy–2020» baǵdarlamasynyń tıimdiligi eskerilip, Elbasy qoldanylý merzimin 2025 jylǵa deıin uzartýǵa sheshim alǵanyn, jyl saıyn qosymsha 30 mıllıard teńge qarastyrýǵa tapsyrma júktegenin, osyndaı qoldaýdyń arqasynda úsh jyldyń ishinde 22 myń adamdy eńbekke tartýǵa, 224 mıllıard teńge salyq jınaýǵa , 3 trıllıon teńgeniń ónimin óndirýge múmkindik beretinin aıtty.
Partııanyń óńirlik aktıvimen ótken keńeste Joldaý talaptaryn sapaly ári ýaqytyly oryndaýdyń tetikteri qarastyrylyp, talqylandy. «Nur Otan» partııasy oblystyq fılıalynyń jetekshisi, aımaq basshysy Qumar Aqsaqalov «Qazaqstan-2021: Birlik, Turaqtylyq. Jasampazdyq» atty saılaýaldy tuǵyrnamanyń oryndalý barysymen tanystyrdy.
Tóraǵanyń birinshi orynbasary Prezıdenttiń strategııalyq bastamalaryn iske asyrýǵa barlyq nurotandyqtar bolyp jumyla atsalysýǵa shaqyrdy. Atqarylǵan jumystardyń sapasyna qoǵamdyq monıtorıng pen baqylaý júrgizý saıası uıymnyń basty mindetine aınalýy tıis. Partııalyq jobalar «Sıfrly Qazaqstan» men «Rýhanı jańǵyrý» baǵdarlamalaryn oryndaýǵa úles qosýǵa baǵyttalýy kerek.
M. Qozybaev atyndaǵy Soltústik Qazaqstan memlekettik ýnıversıtetinde stýdent-jastarmen ótken júzdesýde jastar men otbasy ınstıtýtyn keshendi qorǵaý memlekettik saıasattyń basym baǵyty bolyp tabylatyny aıtyldy. Elbasy jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrýdy tapsyrdy. Kelesi jyl «Jastar jyly» dep jraııalandy. Halyqaralyq talaptarǵa saı oqýǵa, bilim alýǵa, eńbek etýge zor múmkindikter berilip otyr. Qosymsha granttar bólý, jataqhanalar salý sekildi mańyzdy jobalar ret-retimen júzege asyrylady. Jańa mazmunmen odan ári tolyqtyryla túsedi. Árbir qazaqstandyq júrgizilip jatqan reformalardyń máni men mańyzyn jete túsingende ǵana qoǵamdaǵy jańǵyrý zor serpinge ıe bolady, dedi M. Áshimbaev.
О́mir ESQALI,
«Egemen Qazaqstan»
