«Bári de halyqtyń qalaýyna baılanysty. Eger olar bizdiń taǵy bir márte judyryqtasqanymyzdy qalsa, sharshy alańǵa qaıta shyǵýǵa daıynmyn. Esterińizde bolsyn, men osy kúnge deıin eshýaqytta, eshkimmen jekpe-jekke shyǵýdan bas tartqan emespin. Qazirgi ustanymym da sondaı. Jankúıerler GGG men «Kanelo» arasyndaǵy aıqasty taǵy da tamashalaýǵa qulshynys tanytatyn bolsa, kópshiliktiń bul ótinishin oryndaýǵa men ázirmin», deıdi Saýl Alvares.
Sonymen qatar, Meksıka boksshysyna «Dańqty Floıd Meıvezermen qaıta kezdesýge qalaısyz?» degen de saýal qoıyldy. Bul suraqqa ol «Meıvezerge utylǵan kezde meniń tájirıbem azdaý boldy. Ony moıyndaımyn. Ýaqyt oza talaı myqtymen aıqasyp, ábden tolystym. Qazirgi jaǵdaı basqa. Endi AQSh boksshysy táýekelge baryp, menimen jekpe-jekke shyǵa qoımas. Al eger Floıd ynta tanytatyn bolsa, men qýana-qýany kelisemin», dep jaýap qaıyrdy.
Esterińizge sala keteıik, qos boksshy arasyndaǵy báseke osydan bes jyl buryn Las-Vegasta ótken bolatyn. Sol jekpe-jek upaı sanymen Floıd Meıvezerdiń paıdasyna sheshildi. Bul – Saýl Alvarestiń kásipqoı rıngtegi alǵashqy jáne ázirge jalǵyz jeńilisi!
Ǵalym SÚLEIMEN,
«Egemen Qazaqstan»
