Mańyzdy máslıhatqa Úndistannyń Adamı resýrstardy damytý jónindegi bas mınıstri S.Sıngh, Qazaqstannyń Bilim jáne ǵylym mınıstri E.Saǵadıev, Qytaı Halyq Respýblıkasy Bilim mınıstriniń orynbasary L.Hýeısın, Qyrǵyz Respýblıkasy Bilim jáne ǵylym mınıstri K.Kojobekov, Pákistan Islam Respýblıkasy Joǵary bilim jónindegi komıssııanyń atqarýshy dırektory A.Alı, Reseı Federasııasy Ǵylym jáne joǵary bilim mınıstriniń orynbasary M.Borovskaıa, Qazaqstandaǵy Tájikstannyń Tótenshe jáne ókiletti elshisi N.Alızoda jáne О́zbekstannyń Joǵary jáne orta arnaıy bilim berý mınıstriniń orynbasary Ý.Begimqulov qatysty.
Basqosý barysynda elimizdiń Bilim jáne ǵylym mınıstri Erlan Saǵadıev atalǵan alqaly jıynnyń bilim salasy úshin mańyzdy ekenin atap ótti.
«Shanhaı yntymaqtastyǵy uıymyna múshe elderdiń bilim mınıstrleriniń VII keńesi jastardyń jan-jaqty, bilimdi jáne óz isiniń bilikti mamany bolýy úshin túrli jaǵdaı jasaý joldaryn talqylaıdy. Bul másele buǵan deıin de kóterilip, mańyzdy máslıhattarda qozǵalǵan bolatyn. Búgingi sharaǵa jınalǵan ShYU-ǵa múshe elderdiń bilim basshylary bilim salasynda tájirıbe bólisý, stýdenttermen almasý sııaqty ózekti taqyryptar tóńireginde oılaryn ortaǵa salady. Bizdiń elimizdiń jastary da álemniń túkpir-túkpirinde san alýan mamandyq boıynsha bilimderin jetildirý ústinde. Sonymen qatar shetelden kelip bizdiń bilim ordalarymyzdan tálim alyp jatqan ózge ulttyń ókilderi de bar. Búgingi tańda olardyń sany 18 myńǵa jýyq. Kóbi ShYU-ǵa múshe elderdiń jastary. Mysaly, Úndistan memleketiniń Bilim mınıstrimen medısınalyq mamandyq ıelerin, ıaǵnı dárigerlerdi jáne IT mamandaryn kóbirek daıyndaý týraly kelisim jasastyq. Qazaqstannyń da, shetelderdiń de maman daıyndaýda ózindik ozyq tájirıbeleri bar. Kóptegen memleketter qazaqstandyq stýdentterge granttar bólýde. Olardyń ishinde Japonııa, Qytaı, Reseı sııaqty elder jyl saıyn grant sanyn arttyrýda. Baramyz degen balalardyń baǵyn baılamaı, olardyń oqý-bilim jınap qaıtýyn qoldaımyz. Bizdiń qazirgi kezdegi mańyzdy mindetimiz elimizge 40 myń stýdent tartý. Bıyl shetelden 14-18 myń stýdent keldi. Bul – shamamen 20 paıyz. Jyl saıyn grant sanyn arttyrsaq, aldaǵy 5-6 jylda Qazaqstannyń ozyq bilim beretin habqa aınalý múmkindigi bar. Bul úshin birneshe shara qabyldandy», dedi Erlan Kenjeǵalıuly.
Keńestiń qatysýshylary ShYU-ǵa múshe elderdiń ulttyq bilim berý júıelerin damytý jáne jańǵyrtý týraly máselelerin, sondaı-aq 2019-2020 jyldarǵa arnalǵan yntymaqtastyqtyń basym baǵyttaryn talqylady. Sondaı-aq delegasııa basshylary bilim qyzmetkerlerin yntalandyrýǵa, olardyń minsiz jumysqa qyzyǵýshylyqtaryn arttyrýǵa, kásibı deńgeıin joǵarylatýǵa, óziniń qyzmettik mindetterin der kezinde, sapaly ári erikti oryndaýǵa baǵyttalǵan ShYU bilim berý júıesiniń «Qurmetti jumysshysy» týraly qujattardy ázirleýdiń mańyzdylyǵyn atap ótti. Aıta ketetin taǵy bir jaıt, keńeske kelgender ShYU-ǵa múshe elderdiń bilim mınıstrleriniń VIII keńesin Reseıde ótkizýge ýaǵdalasty.
Raýan QAIDAR,
«Egemen Qazaqstan»
