Bul kúnderi Ekibastuzda «Qazaqstan halyq banki» AQ bólimshesiniń bastamasymen «Súıikti qalaǵa syılyq!» atty shara ótkizilýde. Jalpy, ekibastuzdyqtar óz týǵan qalasyn jaqsy kóretini baıqalady. Bıyl 61 jyl tolǵan qala kúnin de atap ótti.
Atalǵan shara qarsańynda bank óz qarajaty esebinen qaladaǵy Máshhúr Júsip atyndaǵy kósheniń 75-shi turǵyn úı aýlasynda, Energetıkter kóshesinde balalarǵa arnalǵan oıyn alańdaryn ornatyp berdi.
Fılıal dırektory Dáýren Sheshembekovtiń aıtýynsha, bank bastamasymen ótkiziletin sharalar kenshiler qalasynyń kishkentaı turǵyndary – balalarǵa arnalady. Búldirshinder oıyn kezinde jaraqat alyp qalmas úshin qaýipsizdik sharasy eskerilip, úı aýlalaryndaǵy oıyn alańdaryna rezeńke jabyndy ornatyldy.
Bank ókilderiniń «Súıikti qalaǵa syılyq!» sharasy ár alýan taqyrypty qamtıdy. Qala turǵyndaryn qysta tegin konkı tebýge, týǵan ólkeniń shejireli tarıhyn kórip bilý úshin «Týǵan ólkeńdi bil» atty jergilikti mýzeı jádigerlerin kórýge shaqyrady. Sondaı-aq soǵys jáne eńbek ardagerlerine de ýaqyt bólip, ortalyq qalalyq aýrýhanada emdelip jatqan kishkentaılarǵa da baryp qaıtýdy dástúrge aınaldyrǵan. Meshittiń aýlasyna aǵash egý sııaqty kógaldandyrý jumystaryn da bank qyzmetkerleri qolǵa alýda.
Qalada áli de bolsa, jóndeý kórmegen turǵyn úılerdiń aýlalary jeterlik. Bank ókilderiniń «Súıikti qalaǵa syılyq!» bastamasyn qoldaıtyn basqa da uıymdar men kásipkerlerdiń nazary túsedi dep senedi jergilikti turǵyndar. Qalalyq ákimdiktiń Turǵyn úı-kommýnaldyq sharýashylyq bóliminiń málimetinshe, endi «Halyq» bankiniń jergilikti bólimshesi jyl sońyna deıin 10 turǵyn úıdiń aýlasyna balalarǵa arnalǵan oıyn alańdaryn ornatýdy josparlap otyr. Aldaǵy jyly qaladaǵy barlyq turǵyn úı aýlalary tolyq jóndelip, qosymsha fýtbol jáne sport alańdary qurylady. Sonymen qatar jalpy aýdany 29 gektardy quraıtyn baq jobasynyń qurylysy da atalǵan bank bastamaq jumystardyń biri bolmaq.
Farıda BYQAI,
«Egemen Qazaqstan»
Pavlodar oblysy
