Halyq qalaýlylary saparynyń maqsaty – Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaýynyń mazmunyn talqylaý, jan-jaqty túsindirý.
– Bıylǵy Joldaýdy ásirese, elimizdegi ustazdar qaýymy zor qýanyshpen qabyldady. Buǵan sebep te joq emes. Memleket basshysy mańyzdy qujatta joǵary bilim berýge qatysty, pedagog mártebesi jaıynda birqatar mańyzdy mindetterdi atap ótti. Atap aıtqanda, 2019 jyly «Pedagogtardyń mártebesi týraly» zań qabyldanady. Bul – qazaqstandyq ustazdar qaýymynyń qoǵamdaǵy bedelin arttyryp, ornyn aıshyqtaýǵa zor qadam bolmaq, – dedi jıyndy ashyp, júrgizip otyrǵan ýnıversıtet rektory G. Aldambergenova óz sózinde.
Parlament Senatynyń Áleýmettik-mádenı damý jáne ǵylym komıtetiniń múshesi Baqytjan Jumaǵulov Elbasy Joldaýynda aıtylǵan aýqymdy jumystardy ret-retimen túsindirdi. Sonymen qatar, joǵary oqý oryndarynyń sapasyn arttyrý, ustaz mártebesin kóterý jaıynda da keńinen toqtalyp ótti. «Elbasy tapsyrmasymen biz ustazdyń mártebesi jaıly zań qabyldaımyz. Bul zańǵa sáıkes, ustazdardyń mártebesin, jumysyn, qyzmetin, kásibı jabdyqtalýyn, materıaldyq ahýalyn túgel ózgertý kerek. Sizderdiń oqý oryndaryńyzda múmkindigi shekteýli balalarǵa arnalǵan ortalyq bar eken. Onda pedagog, psıholog mamandardyń tájirıbeden ótýi ortalyq jumysyn damyta túseri sózsiz», – dedi B. Jumaǵulov.
Senat depýtaty Dınar Nóketaeva ózi alty jyl basshylyq jasaǵan Qyzdar Ýnıversıtetiniń mártebesi týraly baıandady.
– 1944 jyly ashylyp, 75 jyldan beri jumys istep kele jatqan bul bilim ordasy 70 000-nan astam pedagog maman daıyndap shyǵarǵan. Bıylǵy Elbasynyń Joldaýy, negizinen, pedagogtarǵa baǵyttaldy. Onyń ishinde eń tómengi jalaqyny 28 000 teńgeden 42 myń teńgege jetkizý týraly aıtyldy. Úkimetke naqty tapsyrma berildi. Parlament qazir osy zań jobasyn daıyndaýǵa ázir, – dep atap ótti D. Nóketaeva.
Jıyn barysynda ýnıversıtet stýdentteri Memleket basshysynyń Joldaýy tóńireginde saýaldar qoıyp, usynystaryn jetkizdi. Ustazdar men stýdentter strategııalyq mańyzdy qujatta kórsetilgen mindetterdi saralap, tyń oılary men ıdeıalaryn júzege asyrýǵa nıetti. Bul tarapta ýnıversıtettiń arnaıy keshendi óz jospary qabyldanady. Ol Prezıdent tapsyrmalarynyń oryndalýyn, oqý ornynda jaıly orta qalyptastyrýdy jáne oqytýshylardyń kásibı deńgeıin anyqtaýdy qamtamasyz etpek. Alqaly basqosýdy G. Aldambergenova qorytyndylap, halyq qalaýlaryna erkin formattaǵy mazmundy áńgimesi úshin ýnıversıtet ujymynyń atynan alǵys bildirdi.
Aıgúl AHANBAIQYZY,
«Egemen Qazaqstan»
ALMATY
