Keshe tórt salmaq dárejesiniń júldeleri sarapqa salyndy. Uldar arasynda 55 kılo salmaqta Damır Bolatbekov baq synady. О́kinishke qaraı, ol birinshi kezdesýde-aq qyrǵyzstandyq Qubanyshbek Aıbekulyna jol berdi. 60 kılo salmaqtaǵy Baýyrjan Narbaev alǵashqy aınalymdarda túrkııalyq Mıhras Aqqus pen gonkongtyq Martın Laýdy utqanymen, ile-shala japonııalyq Genkı Kogaǵa ese jiberdi. Jubanysh básekesinde qandasymyz rýmynııalyq Lýchıan Dýmıtresýdi jeńgenimen, brazılııalyq Renan Torreske áli jetpedi. Dál osy salmaqta beldesken taǵy bir sportshymyz Arslan Esengel ekinshi kezdesýinde utyldy.
Qyzdar arasynda 44 keli salmaq dárejesinde Qazaqstannyń dzıýdoshylary kúresken joq. Esesine 48 kılo salmaqta qos birdeı arýymyz boz kilemge shyqty. Ǵalııa Tynbaeva men Aqmaral Naýatbektiń ekeýi de Ýkraınanyń maqtanyshy Darııa Belodedten utyldy. 10 qazanda ǵana 18 jasqa tolǵan bul sportshysy jýyrda Bakýde eresekter arasynda ótken álem chempıonatynda altynnan alqa taǵynyp, aıdy aspanǵa shyǵarǵan bolatyn Bul jarysta da Darııanyń ústemdigi esh kúmán týǵyzǵan joq. Jubanysh básekesine qatysý quqyǵyna ıe bolǵan Ǵalııa Tynbaeva alǵashynda Haıma Edınarıden aılasyn asyrǵanymen, kelesi beldesýinde ıspandyq Laýra Martınes Abelandanyń osal tusyn taba almady.
21 qazanǵa deıin jalǵasatyn atalmysh jarysta Qazaq eli namysyn aldaǵy kúnderi myna balýandar qorǵaıdy:
Uldar – Sunǵat Jubatqan men Baqytjan Ábdýrahmanov (66 kılo), Ańsarbek Ǵaınýllın men Janbolat Baǵytbergenov (73 kılo), Erasyl Bolat pen Dınahmet Rysymbek (90 kılo) jáne Sanjar Jabborov (+100 kılo).
Qyzdar – Aıda Karchaeva (57 kılo), Móldir Narynova (70 kılo), Nazerke Tileýhanova (78 kılo) jáne Kamıla Berliqash (+78 kılo).
Ǵalym SÚLEIMEN,
«Egemen Qazaqstan»
