2000 jyly 31 tamyzda Qazaqstan Respýblıkasy Úkimetiniń №1325 qaýlysymen Qyzyljar orta mektebine Ǵabdolla Mahambetov esimi berilgen edi. Ǵabdolla Mahambetov – qazaqtyń alǵashqy kásibı muǵalimderiniń biri, Batys Qazaqstan óńiriniń bilim júıesine erekshe eńbegi sińgen tulǵa bolatyn.
Ǵabdolla Mahambetov 1888 jyly qazirgi Atyraý oblysynyń Qyzylqoǵa aýdany aýmaǵynda dúnıege kelgen. 1909 jyly Orynbor muǵalimder semınarııasyn tamamdap, týǵan jerinde kelgende keıin búkil qazaqtyń maqtanyshyna aınalǵan sóz zergerleri Zeınolla Qabdolovqa, Ǵabdol Slanovqa sabaq bergen eken. Ol kezde qazirgi Atyraý Oral oblysyna, Qyzylqoǵa óńiri Taıpaq aýdanyna qaraıtyn. 1932-1934 jyldary Ǵabdolla Mahambetov Taıpaq aýdanynyń Bazartóbe, 1934-1959 jyldary zeınet demalysyna shyqqanǵa deıin Qyzyljar mektebinde eńbek etti. Jıyrma jyl dırektor bolyp, osy mektepti basqardy. 1940 jyly Qazaq SSR Joǵarǵy Keńesiniń Qurmet Gramotasymen, 1939 jáne 1949 jyldary sol kezdegi eń joǵary nagrada – Lenın ordenimen marapattaldy.
Ǵabdolla Mahambetov erekshe bilimdi, minezge baı, halyq arasynda asa syıly muǵalim bolǵan. Uly Otan soǵysy jyldarynda turmys qıynshylyǵynan mekteptegi oqýyn jalǵastyra almaı qalǵan oqýshylaryn izdep baryp, janashyrlyqpen sóılesip, oqýyn jalǵastyrýyn ótingenin sol kezdiń kýágerleri ańyz etip aıtady. Qazaq SSR-iniń eńbek sińirgen muǵalimi, Halyq aǵartý isiniń ozaty, respýblıkalyq dárejedegi derbes zeınetker 1967 jyly ómirden ótti. Biraq ustazdyń eńbegin jarty ǵasyr ótse de umytpaǵan shákirtteri men urpaqtary ózi esimin ıelengen mektep ǵımaraty aldynda eskertkishin ornatty. Bul oqıǵa Qazaqstan Prezıdentiniń ustaz bedelin erekshe aıshyqtaǵan Joldaýymen tuspa-tus kelýiniń ózi tegin emes.
- Elbasy N.Á.Nazarbaev «Rýhanı jańǵyrý» baǵdarlamasynda «Biz jańǵyrý jolynda babalardan mıras bolyp, qanymyzǵa sińgen izgi qasıetterdi qaıta túletýimiz kerek. Bul tarıhtyń jasampaz búgingi kún men jarqyn bolashaqtyń kókjıekterin úılesimdi sabaqtastyratyn ult jadynyń tuǵyrnamasy» degen bolatyn. «О́tkenin bilmegen eldiń bolashaǵy bulyńǵyr», keshegi uly tulǵa Ǵabdolla Mahambetov esimi búgingi mektebimizdiń tarıhynda altyn árippen jazýly, - dedi eskertkishtiń saltanatty ashylýy kezinde atalǵan bilim ordasynyń basshysy Qanapııa Taspaı.
Ustazdy ulyqtaǵan sharaǵa Aqjaıyq aýdany ákiminiń orynbasary Asqar Ábýǵalıev, aýdandyq ardagerler keńesiniń tóraǵasy Serik Baqmanov, osy mektepti ár jyldary bitirgen túlekter arnaıy kelgen eken. Ǵabdolla Mahambetovtiń urpaqtary Roza men Razııa Ǵabdollaqyzy, Nurjan Ǵabdollauly, kelini, ardager ustaz Baqytjamal Qajybaeva, aqyn Tiles Jazyqbaev taǵy basqalar sóz sóılep, tarıhı tulǵanyń taǵylymdy isteri týraly estelikterdi ortaǵa saldy. Mektep oqýshylary Quralbek Baqtygereı, Zýlfııa Ermekqalıeva, muǵalim Saıa Karımýllına Ǵabdolla Mahambetulyna arnaǵan óleń jyrlaryn oqyp, basqa da ónerlerin kórsetti.
Saltanatty shara sońynan mektepte Ǵabdolla Mahambetovti eske alýǵa arnalǵan dástúrli voleıbol týrnıri ótti. Oǵan Aqjaıyq aýdanynyń Almaly, Sarytoǵaı, Qyzyljar, Taıpaq aýylynan muǵalimder komandasy kelgen eken. Týrnır jeńimpazdary Ǵ.Mahambetovtiń urpaqtary taǵaıyndaǵan baǵaly syılyqqa ıe boldy.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Turǵalı ǴUMAROV
