Qaraǵandy oblysynyń ákimdigi jáne «Arselor Mıtall Temirtaý» AQ bas dırektory Paramjıt Kalon áleýmettik mańyzy bar nysandardy salý týraly memorandýmǵa qol qoıdy. Bul sońǵy 8 jyl ishinde áleýmettik jaǵdaıdy jaqsartýǵa baǵyttalǵan qol qoıylyp otyrǵan alǵashqy qujat.
Memleket basshysy jaqynda kenshiler óńirine jasaǵan issapary barysynda temirtaýlyqtardyń turmysyn jaqsartýǵa baǵyttalǵan birqatar tapsyrmalar bergen bolatyn.
Nursultan Nazarbaev jańa emhana, balalar baqshasyn, sporttyq saýyqtyrý keshenin salý týraly tapsyrma bergen edi. Áleýmettik jaýapkershilik sheńberindegi atalǵan jumystarǵa jumsalatyn barlyq shyǵyndardy «AMT» óz moınyna alady. Qazirgi ýaqytta árbir nysan boıynsha jobalar ázirlengen. Barlyq nysandar jańa zaman talaptaryna saı úlgide salynatyn bolady.
«Memleket basshysynyń arqasynda 20 myń adamǵa arnalǵan emhana salynyp, eń bastysy bul nysan aldaǵy ýaqytta qaladaǵy medısınalyq mekemeler boıynsha qajettilikti tolyqtaı sheshedi. Al 320 orynǵa arnalǵan balalar baqshasynyń salynýy Temirtaý qalasyna oblysta birinshi bolyp tolyqqandy mektepke deıingi sapaly tárbıe berýge aýysýǵa múmkindik jasaıtyn bolady. Atalǵan máseleler Elbasymyzdyń joldaýynda aıtylǵan bolatyn. Bir sózben aıtqanda, balalardy balabaqshaǵa 3 jastan bastap emes, 1 jastan bastap qabyldaýǵa múmkindik týatyn bolady», dep tolyqtyrdy óńir basshysy.
Emhana men balabaqshadan ózge Elbasy berilgen tapsyrmanyń sheńberinde qalada jańa zamanǵa saı dene shynyqtyrý jáne saýyqtyrý kesheni salynatyn bolady. Sporttyq nysan 320 orynǵa arnalǵan. Atalǵan nysan 30 myń turǵyny bar yqsham aýdannyń janynan boı kóteretin bolady.
О́z kezeginde Paramjıt Kalon atalǵan áleýmettik mańyzy bar nysandardyń qarqyndy túrde salynatynyn atap ótti. «Barlyq aıtylǵan nysandardy biz belgilengen merzimde salýǵa kúsh salatyn bolamyz. Qurylys jumystary barynsha jyldam júrgiziletin bolady. Qurylys jumystary aıaqtalǵan soń biz atalǵan nysandardy Prezıdentke kórsetetin bolamyz» - dep atap ótti Paramjıt Kalon.
Sonymen qatar Temirtaý qalasynda sapaly jylý berýdi qamtamasyz etýge baǵyttalǵan sharalar qolǵa alynýda. Elbasy 2-JES modernızasııalap, 7 qazandyqty salýdy talap etken bolatyn. Qazirgi ýaqytta barlyq máseleler sheshilip, jobalyq smetalyq qujattar ázirlenip jatyr. Kelesi jyly atalǵan nysannyń qurylysy bastalatyn bolady.
