«Nurly jer» baǵdarlamasy boıynsha bul jobany iske asyrýǵa oblystyq bıýdjetten alynǵan nesıeler esebinen 4 mlrd. 917 mln. 148 myń 100 teńge bólingen. Qurylysty 2020 jyly tapsyrý josparlanǵan. Bólingen 67 ga jer teliminde 47 úı salynyp, 5190 páter paıdalanýǵa berilýge tıis. Qazirgi ýaqytqa 25 úıdiń, ıaǵnı 2172 páterdiń qurylysy júrgizilip jatyr. Shaǵyn aýdan qurylysynda 380 adam jumys isteıdi. Sol sııaqty munda áleýmettik nysandar: 280 oryndyq 2 balabaqsha, 1200 oryndyq mektep, emhana, muz saraıy, ulttyq mádenıet ortalyǵy, smart-ortalyq jáne qonaqúı bolady.
«Elbasynyń «7-20-25» baǵdarlamasynyń arqasynda búgingi kúnderi túrli mamandyq ıelerine ózderiniń birinshi turǵyn úılerine ıe bolý úshin jaqsy múmkindik týyp otyr. Bul baǵdarlama elimizde turǵyn úıge degen suranystyń aýqymdylyǵynan, jeke turǵyn úı alǵysy keletin jastarymyzdyń kóptiginen týyndap otyr. Tutastaı alǵanda, Prezıdenttiń «Bes áleýmettik bastamasy» búginderi Qazaqstanda belsendi túrde iske asyrylýda, sondyqtan da Elbasy onyń bıylǵy joldaýdaǵy rolin atap ótti» dedi «Nur Otan» partııasy fraksııasynyń múshesi Asylbek Smaǵulov.
Halyq qalaýlylarynyń aıtýynsha, «7-20-25» baǵdarlamasy Qostanaı oblysynda endi ǵana iske asyrylyp jatyr, ony tolyǵymen qamtý úshin, naryqta turǵyn úılerdi kóbeıtý qajet. Sondaı-aq, olar aımaqta «Nurly jer» baǵdarlamasy tabysty ıgerilip jatqanyn atap ótti.
«Turǵyn úı jınaq banki» ókiliniń aıtýynsha, Iýbıleınyı» shaǵyn aýdanynda jyl sońyna deıin, 5 úı, sonyń ishinde 600 páter iske qosylmaq.
Názıra JÁRIMBET,
«Egemen Qazaqstan»
Qostanaı
