Balań kezinen ákesi kúıshi, sazger Taımannyń tálimin alǵan Roza qazaqtyń Dına, Naýsha, Altynaı, Aqqyz, Barsha, Zámzám, Baqyt syndy dúldúl kúıshi qyzdarynyń úkili izbasary, HIH-HH ǵasyrdyń kúı-júgin arqalaǵan Dınanyń júgin kóterip, óz kezeginde HH-HHI ǵasyrdyń qyz-kelinshekter kúı-kerýeniniń tizginin ustaǵan kóshbasyndaǵy balbarmaq.
Oınalýy qıyn kúrdeli kúılerdi múltiksiz ıgerip jáne múdirmeı oryndaýymen kóptiń kóńilin aýdarýymen 9 jasynda sahnaǵa shyqqan Roza búginde 66 jastaǵy arqaly kúıshi, talantty shákirtterdi tárbıelegen ulaǵatty ustaz, asyl ana, abzal áje. Shákirti demekshi, Rozanyń tálimin alǵan Abylaı Tilepbergenov – «Serper» jastar syılyǵynyń ıegeri, Tuńǵysh Prezıdent qory syılyǵynyń laýreaty, Qurmanǵazy atyndaǵy Qazaq memlekettik akademııalyq halyq aspaptar orkestriniń bas dırıjeri, birneshe halyqaralyq, respýblıkalyq kúı baıqaýlarynyń bas júldegeri. Al Rozanyń ózi bolsa, Mańǵystaý mádenıetiniń damýyna óz úlesin qosýmen keledi – óz áriptesterimen birge óńirdegi «Aqjarma» ansambli men A.Taraquly atyndaǵy ult-aspaptar orkestriniń, Mańǵystaý О́ner kolledjiniń negizin qalaýshylardyń biri bolǵan ol osy ujymnyń sapynan áli qalǵan joq. Shetelderge gastroldik saparlarǵa shyǵyp, qazaqtyń has ónerin tanytýdan tanbaıtyn R.Aıdarbaevanyń 40 jasynda 3 saǵatta 70 kúı oryndap berip, repertýarymda 400 kúı bar degeni búginde el arasynda ańyzdaı aıtylady.
Buǵan deıin qyz-kelinshek kúıshilerdi eske alý baǵytynda uıymdastyrylyp kelgen baıqaý bıyl Mańǵystaýda jańasha jarqyrady. Eliniń yqylasyna mereılengen Roza kúıshi qazylardy basqaryp, izbasar sińlileriniń sheberligin baǵalap tórde otyrdy. Respýblıkanyń Astana, Almaty, Semeı, Oral, Qaraǵandy, Atyraý, Aqtóbe, Qyzylorda, Mańǵystaý óńirlerinen jınalǵan 22 qyz eki kún boıy kúı dodasyn dúbirletti. Shart ta ońaı emes, kez kelgen kúıshiniń táýekeli jete bermeıtin Abyldyń «Abylyn», Dınanyń «Baıjumasyn», О́skinbaıdyń «Bulbul Aqjeleńi» men Jantóreniń «Shalqymasyn», sondaı-aq Roza men onyń ákesi Taımannyń kúılerin oryndaý mindettiligimen birge, orkestrdiń demeýimen N.Tilendıevtiń, A.Jaıymovtyń, Mahambettiń kúılerin oryndaý talap etildi. Eki kún boıy kúı súıer kórermenderge áserli kesh syılaǵan baıqaýda úshinshi oryndy almatylyq T.Qydyrsıhova men aqtaýlyq D.Perdebekova, astanalyq T.Úmbet ıelense, ekinshi oryndy atyraýlyq N.Zınor óziniń almatylyq qurbysy S.Ábdýahappen bólisti. Al teń dárejede óner kórsetken almatylyq Á.Bekenova men atyraýlyq A.Sakýpova birinshi oryndy ıelense, bas júldeni Almatydan kelgen kúıshi N.Bazarbaeva jeńip aldy. О́zge kúıshi qyzdarǵa Taıman Aıdarbaev atyndaǵy arnaıy júlde men yntalandyrý syılyqtary tabys etildi.
– «Rýhanı jańǵyrý» baǵdarlamasy aıasynda kúıshi qyz-kelinshekterdiń baıqaýyn ótkizgen aımaq jáne sala basshylyǵyna alǵys aıtamyn. Bul – kúıge qurmet, jastarǵa qoldaý, dese kesh sońynda Roza Aıdarbaeva, «taǵylymy kóp maǵynaly kesh dástúrli qalypqa tússe» deıdi kórermender.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
