Nazarbaev ortalyǵynda ótken forým jumysyna Qoǵamdyq damý mınıstri Darhan Káletaev, Astana qalasynyń ákimi Baqyt Sultanov, sondaı-aq Parlament pen qalalyq máslıhat depýtattary, úkimettik emes uıym ókilderi jáne jastar birlestikteriniń jetekshileri qatysty.
Jıyndy ashqan Qoǵamdyq damý mınıstri Darhan Káletaev: «Osydan 15 jyl buryn Qazaqstannyń azamattyq alıansynyń bastamasymen elimizde alǵash ret úkimettik emes uıymdar óz jumysyn bastaǵan bolatyn. Osy arqyly memleket pen qoǵam, azamattar men bılik arasyndaǵy konstrýktıvtik dıalogqa, qoǵamdyq kelisim men tatýlyqqa qol jetkizdik», dedi.
Vedomstvo basshysynyń aıtýynsha, Qazaqstannyń bul tájirıbesi halyqaralyq deńgeıde qoldaý taýyp otyr. Sonymen qatar mınıstr málimdemesinde ÚEU ókilderi úshin jaǵymdy jańalyǵyn jetkizdi. «Forým barysynda atalǵan salaǵa qatysty jaǵymdy jańalyqpen bóliskim keledi. Astanada azamattyq bastamalar ortalyǵynyń qurylysy bastaldy. Odan bólek áleýmettik kásipkerlikti damytýǵa arnalǵan birqatar jobalar qolǵa alynýda. Elimizdiń barlyq óńirleri boıynsha áleýmettik jobalardyń kartalary jasalady. Jalpy, Astanaǵa búkil respýblıka boıynsha Memlekettik áleýmettik tapsyrystyń shamamen 11%-y keledi», dedi mınıstr.
Búgingi tańda ÚEU boıynsha Almaty qalasy kósh bastap tur. 5300 ÚEU tirkelgen, bul respýblıkadaǵy barlyq ÚEU ¼ bóligin quraıdy. Astana qalasynda 2700 ÚEU tirkelgen. Bul respýblıka boıynsha 12%-dy quraıdy.
Prezıdıým múshesi Astana qalasynyń ákimi Baqyt Sultanov ÚEU azamattyq qoǵamdaǵy mańyzdy jumystardy atqarýshy ǵana emes, memlekettik áleýmettik jobalardy júzege asyrýdaǵy senimdi serigine aınalǵanyn aıtty. «Búginde Astana ákimdigi men 30-dan astam ÚEU birlesip 464 mıllıon teńgege 66 áleýmettik mańyzy bar jobalardy júzege asyrdy. Budan bólek memlekettik baǵdarlamalardy iske asyrýda ÚEU qoǵamdyq pikirdi eskere otyryp jumys isteý múmkindigin týǵyzady. Sondyqtan búgingi forýmda biz qoǵamdy damytýǵa baǵyttalǵan árbir joba men basqa da sheshilmeı jatqan máselelerdi kóterip, birlesip qarastyratyn bolamyz», dedi Baqyt Sultanov.
Astana qalasy ákiminiń aıtýynsha, búginde elordalyq ÚEU halyqtyń ómir súrý sapasyn arttyrýǵa baǵyttalǵan naqty áleýmettik mańyzdy jobalardy júzege asyryp jatyr.
Forým barysynda qatysýshylar suraq qoıyp, jıyn sońy pikir almasýǵa jalǵasty. ÚEU úshin granttar usyný, Astana qalasynyń ÚEU men azamattyq qoǵamǵa qoldaý kórsetetin azamattyq bastamalardy qoldaý resýrstyq ortalyǵyn qurý týraly máselelerdi qarastyrǵan qarar qabyldady.
Forým sońynda 19 tamyz ben 20 qyrkúıek aralyǵynda ótkizilgen áleýmettik jobalar baıqaýynda úzdik dep tanylǵan qatysýshylardy Astana qalasy ákiminiń orynbasary Ermek Amanshaev marapattady. Aıta keteıik, qarashanyń 27-28 kúnderi Elbasynyń qatysýymen Respýblıkalyq azamattyq forým ótedi.
Aqmaral AǴZAMQYZY,
«Egemen Qazaqstan»
