Medıýmdar, ıaǵnı o dúnıedegi máıittermen sóılesetin adamdar adamzat tarıhynda bolǵan. Ondaı oqıǵalar spırıttik seanstar kezinde, trans jaǵdaıynda júzege asady. Bul kásip Amerıkany keńinen qamtyp, Eýropany sharlap, Reseıge de jetken. Resmı ǵylym muny moıyndamaıdy, degenmen materıalıstik kózqarastarǵa qarsy kúresýshiler spırıtızmniń múmkindikterine senedi.
Ústel basynda bir top adam otyr. Onyń qaq ortasynda shyny ydys tóńkerilip qoıylady da oǵan jurt ústelge janaspaıtyndaı etip, saýsaǵyn tıgizip otyrady. Onyń tóńiregine ártúrli áripter jazylǵan.
Shamaly ýaqyttan keıin shyny ydystyń tabaǵy baıaý jyljı bastaıdy. Onyń taıaqshasy áripterdiń tusyna kidirip, odan sóz qurastyrylady. Sóıtip ústel basyndaǵy adamdar «arýaqtarmen» tildese bastaıdy. Ústel basynda otyryp, «o dúnıeden» kim qajet bolsa, sony shaqyrýǵa bolady. Bul isti o dúnıe men bul dúnıeniń arasyndaǵy deldaldar, ıaǵnı medıýmdar júzege asyrady.
Aqylǵa qona ma? Senimdi me?
Alǵashqy medıýmdardyń biri – aǵylshyndyq Leslı Flınt. Ol 1911 jyly Londonda týǵan. 7 jasqa kelgende boıynda ózgelerge uqsamaıtyn ereksheliktiń bar ekenin sezedi. Ol únemi arýaqtardyń beınesin kórip júredi.
1935 jyly ol birinshi ret eki myń kórermenniń aldynda seans ótkizedi. Sol sátten bastap ony ǵalymdar, psıhologter, parapsıhologter, ınformatıka men elektronıka mamandary zertteı bastaıdy. Biraq bul salanyń mamandarynyń birde-biri ony kózboıaýshy dep aıtqan emes.
Keıin oǵan Djordj Výrs, al 1953 jyly Bettı Grık degen medıýmdar kómektesken. Olar magnıtafon taspasyna arýaqtardyń daýsyn jazyp alyp, ony suraǵandarǵa berip otyrǵan. Olardyń jazbalaryn ınternet saıttarynan taýyp, oqýǵa bolady.
Budan birshama ýaqyt buryn Amerıkada adam aıtsa nanǵysyz oqıǵa boldy. Los-Andjeleste arýaqtar qolynan medıým Lına Iаnkovıs qaıtys boldy. Spırıtızmniń túngi seansy kezinde ol kisi adam óltirgish Ýılıam Debbstiń arýaǵyn shaqyrǵan bolatyn. Arýaq oǵan energetıkalyq soqqy bergen. Medıým til tartpaı ketken. Dárigerler oǵan júrek qaby jarylǵan degen dıagnoz qoıǵan.
Ýılıam Debbs kim edi? Ol naǵyz qanisher bolatyn. 1937 jyly bir úıli jandy qyryp, qolyn qanǵa bylǵaǵan. Onyń nemereleri men shóbereleri osy oqıǵany atalarynyń óz aýzynan estip, ne úshin olaı istegeni týraly suramaqshy bolǵan. «Bólme ishi aldymen sondaı qorqynyshty bolyp ketti», deıdi qanisherdiń 41 jastaǵy nemeresi Gorett Ralf, – biz, týystar ústeldi jaǵalaı otyrdyq ta, Iаnkovıs hanym ortada otyrǵan. Atamyzdyń arýaǵyn bir saǵattaı shaqyrdy. Jaýap bolmaǵan soń biz tyqyrshı bastadyq. Men tipti spırıtızm – kózboıaýshylyq degen oıǵa berilip otyrǵanmyn. Aıaqastynan ústel beti býlanyp ketti de, men ózimdi sýyq urada otyrǵandaı sezine bastadym. Aldymda turǵan beıneniń atam ekenin birden tanydym, sebebi bizde ol kisiniń sýretteri kóp bolatyn. Biraq júzi álem-tapyryq, men buryn ondaıdy kórmegenmin. Denem muzdap ketti. «Shaıtan» bolar degen oı basyma sart ete tústi. Osy kezde «Meniń arýaǵymdy mazalaǵan adam ólýi tıis!» dep suq saýsaǵymen Lına hanym jaqty nusqady. Medıýmnyń osy sátte jan daýsy shyqty da sulq tústi. Ol tilge kelmeı úzilip ketti.
Debbs shal tuqymymyzdaǵy jalǵyz qanisher bolǵandyqtan, onyń osyndaı jolǵa túsýiniń sebebin bilgimiz kelip edi. Iаnkovıs kásibı medıým ári jurtqa sonsha syıly bolǵandyqtan ótinbes nárseni ótinip, ókinishke qalyp otyrmyz», deıdi.
Muny «o dúnıelik baılanys ornatýǵa bolady» deýdiń naqty faktisi dep qarasaq, onda bul baılanys qalaı ornaıdy?
Birinshi boljam bylaı: ólgen adamdardyń sanasy óris retinde, ekinshi bir sózben aıtqanda, aýqymdy aqparattyq óris retinde saqtalyp qalady da tiri adamnyń sanasyna qosylady. Muny ǵylymı ıdeıa retinde tuńǵysh ret máskeýlik V.V.Nalımov aıtqan bolatyn. Biraq bul qosylystyń mehanızmi qandaı, ony tosyn qubylystardy zertteýshilerdiń birde-biri aıta almaıdy.
Ekinshisi, tirshilikte ólgen adamnyń aqparattyq órisi qalatyn bolsa, onda medıým erekshe talant ıesi, erik arqyly ony tiri adamnyń sanasyna kvanttyq deńgeıde qosady da aqparat almasý júzege asady. Bul boljamdy naqtylaý úshin tosyn qubylystardy zertteýshiler fızıktermen birlese jumys isteýleri kerek.
