Alash azamaty – Tólegen Imanǵazıev týraly derekterdi alǵash taýyp, birneshe kitap shyǵaryp, aýyl mektebiniń qabyrǵasyna eskertkish taqta ornatqan osy aýyldyń týmasy, belgili ólketanýshy, Qazaqstannyń qurmetti jýrnalısi, Qaratóbe aýdanynyń Qurmetti azamaty, aqyn Qaıyrjan Hasanov bolatyn. Búginde Qaıyrjan aǵamyz ómirden ótse de, urpaqtary kıeli meken – atajurtyn umytpaı, aýyl turǵyndaryna turaqty túrde qaıyrymdylyq sharalaryn jasap turady. Bıyl jazda Nurjan Qaıyrjanuly Sáýle aýylynyń sábılerine arnap quny 1,6 mln teńgelik balalar alańyn tartý etti.
Sondaı-aq 2018-2019 jańa oqý jyly qarsańynda «Mektepke jol» aksııasy aıasynda jalpy quny 50 myń teńge bolatyn keńse zattary men oqý quraldaryn jetkizdi. Degenmen aıtaıyn degenimiz bul emes.
Mektep qabyrǵasyna Tólegen Imanǵazıevke arnalyp eskertkish taqta ornatyldy dedik. Bul 2013 jylǵy qyrkúıek aıy bolatyn. Aýyl mektebiniń muǵalimi Asqar Sapaulynyń aıtýynsha, keler jyly, ıaǵnı 2014 jyldyń kókteminde mektep qabyrǵasyna taıaý, dál eskertkish taqta tusynan shybyq shyǵyp, búr jarǵan!
– Arnaıy ekseń, tap osylaı shyqpas. Ol shybyq qalaı shyqty, eshkim sýarmaı-aq japyraq jaıǵanyna mektep ujymy bolyp tańǵaldyq. Ardager ustaz Tólegen atamyzdyń arýaǵy esimin ardaqtaǵan urpaqtaryna, mektep ujymyna rıza shyǵar. Atanyń arýaǵy qoldap shyǵarǵan aǵash shyǵar destik biz. Qazir ýaqtyly sýaryp, kútimge alyp otyrmyz, – deıdi Asqar aǵaı.
Qaratóbe óńirinde mundaı kıeli terek jalǵyz emes. Saraljyn aýylynyń burynǵy Besotar bólimshesi jaǵynda «Jumaly aǵashy» degen jalǵyz terek boldy. Ony ekken – akademık Qajym Jumalıevtiń ákesi, qarabýra Jumaly degen kisi eken. Sonaý jyldary kezekti eńbek demalysynda Qajym Jumalıev Mahambet degen jas balasymen ataqonysyna kelip, týǵan jerdiń topyraǵyna áýeli ózi aýnap, sosyn balasyn aýnatyp alady eken.
Qazbek QUTTYMURATULY,
«Egemen Qazaqstan»
Batys Qazaqstan oblysy
