Jasyratyny joq, tórtkúl dúnıeniń teńdessiz balýandary bas qosqan baıraqty básekede dál osy órender júlde alady dep oılaǵan jankúıerler kemde-kem. Desek te esimderi kópshilikke beımálim qazaqtyń qos óreni Vengrııanyń astanasynda óte keremet óner kórsetip, búgingi tańda ózderiniń sporttyq mansabyndaǵy eń zor kórsetkishke qol jetkizip otyr. Atap aıtsaq, 60 kılo salmaqtaǵy Aıdos Sultanǵalı alǵashqy aınalymda Eýropa birinshiliginiń qola júldegeri, ýkraınalyq Dmıtrıı Symbalıýkti (6:1) utsa, ile-shala Rıo Olımpıadasynyń kúmis júldegeri, Azııa oıyndarynyń jeńimpazy, qurlyq chempıony, japonııalyq Sınobý Otaǵa (7:5) shań qaptyrdy. Shırek fınalda jasóspirimder arasyndaǵy álem birinshiliginiń jeńimpazy, qyrǵyzstandyq Qaly Sýlaımanovtyń (9:0) tas-talqanyn shyǵarǵan ol jartylaı fınalda Eýropa chempıony, reseılik Sergeı Emelınge (0:9) ese jiberdi. Al qola medal úshin básekede Aıdos Soltústik Koreıanyń ókili Se Ýng Rıden (1:1) aılasyn asyrdy.
67 kılo salmaqtaǵy Meıirjan Shermahanbetke jerebe tipten qıyn tústi. Tusaýkeser kezdesýinde ol álem birinshiliginiń qola júldegeri, túrkııalyq Iýksel Ataqanmen jolyqty. Alaıda áıgili qarsylasynyń esh qaımyqpaǵan qandasymyz 12:0 esebimen aıqyn jeńiske qol jetkizdi. Odan keıin Meıirjan ataǵy jer jarǵan Kýba qabylany, álem chempıony, Olımpııa oıyndarynyń jeńimpazy Ismael Borreronyń «byt-shytyn» shyǵardy. Shırek fınalda Azııa oıyndarynyń jeńimpazy, ırandyq Muhammadreza Abdolhamıd Rezaıdy tyrp etkizbedi. Bul kezdesýde 9:0 esebi tirkeldi. Jartylaı fınalda álem birinshiliginiń eki dúrkin qola júldegeri, Eýropanyń eki dúrkin chempıony, Eýropa oıyndarynyń jeńimpazy Artem Sýrkovtan (1:3) utylsa, úshinshi oryn úshin tartysta Fransııanyń myqtysy Mamadassa Sıllany jeńdi.
Ǵalym SÚLEIMEN,
«Egemen Qazaqstan»
