Eki konferensııa da bıyl TÚRKSOI uıymy tarapynan ataýly jyl bolyp jarııalanǵan qyrǵyz jazýshysy Shyńǵys Aıtmatovtyń 90 jyldyǵyna jáne qazaq aqyny Maǵjan Jumabaıdyń 125 jyldyǵyna arnaldy. TÚRKSOI Bas hatshysynyń orynbasary Fyrat Pýrtash bastaǵan resmı delegasııa men jıynǵa qatysýshy ǵalymdardy Makedonııa Syrtqy ınvestısııalar mınıstri Adnan Kahıl jáne Mádenıet mınıstri Asaf Ademı arnaıy qabyldap, uıymnyń mádenı ıntegrasııa salasyndaǵy jańashyl jobalaryna tabys tiledi.
Konferensııada sóz alǵan ǵalymdar qazaq aqyny Maǵjan Jumabaı men qyrǵyz jazýshysy Shyńǵys Aıtmatov muralarynyń túrki halyqtarynyń mádenı ómirindegi orny men mańyzyna toqtalyp, olardyń álem ádebıetine ákelgen jańalyqtaryn sóz etti.
Jıyn kezinde «Maǵjan Jumabaı jyly» aıasynda TÚRKSOI halyqaralyq uıymy tarapynan jarııalanǵan Maǵjan aqynnyń úsh jınaǵy tanystyryldy. Olardyń birinshisi - túrik tiline jańadan aýdarylǵan (aýdarmashy - Alı Akbash) «Alystaǵy baýyryma» jınaǵy, ekinshisi – aqynnyń on eki tildegi aýdarmalarynyń toptama jınaǵy (qurastyrǵan- Asqar Turǵanbaev), úshinshisi – ázirbaıjan tilindegi (aýdarmashy – Ramız Ásker) Maǵjannyń «Túrkistan» toptamasy.
Skope qalasyndaǵy Makedonııa memlekettik ýnıversıtetiniń Túrkologııa bóliminde jáne Gostıvar qalasyndaǵy Vızıon ýnıversıtetterinde ótkizilgen konferensııalardyń nátıjesinde Maǵjan aqynnyń muralaryn makedon tiline aýdarý kelisildi.
