Baqtııar Artaev, Mereı Aqshalov, Nurjan Káribjanov, aǵaıyndy Aıbek pen Nurbek Oralbaı, Qanat Ábýtálip, Lázzat Kúngeıbaeva, Meıirim Nursultanov syndy bokstyń jaryq juldyzdary, jas býynnyń súıikti keıipkerleri kópshilikpen kezdesip, salıqaly suhbat júrgizdi.
«Boks, onyń ishinde bizge etene tanymal bolyp ketken aǵylshyn boks stıliniń olımpıadalyq sport retinde tirkelýi, damýy jáne bul ındýstrııanyń toǵyz joldyń torabyndaǵy qazaq jerine de kelýi zańdylyq bolatyn. Sonaý el ashtyqqa ushyrap, jappaı kollektıvtendirý júrip jatqan qıyn qystaý zamanda boks sport retinde uly dalaǵa kelgen. 85 jyldy keıinge shegerseńiz 1933 jylǵa tap bolasyz», - delingen habarlamada.
Qasıetti de qasterli, barsha qazaq eliniń qara shańyraǵy sanalatyn Mańǵystaý óńiriniń týmasy Shoqyr Bóltekuly Almatyda alǵash jas órender tárbıelep bastaǵan. Keıin Qaraǵandy, Qyzylorda, Orynbor, Qyzyljar, Jambyl, Shymkent, Taskent qalalarynda sport seksııalary ashyldy.
Búgingi merekelik shara aıasynda osyndaı tarıhı derekter nasıhattalyp, meımandar arasynda konkýrstar uıymdastyrylyp, túrli syılyqtar úlestirildi. Sporttyq jattyǵýlar ótip, ánnen shashý shashyldy. Bokstyń jarqyn ókilderi buqaramen estelik sýretke tústi.
«Qazaq boksynyń 85 jyldyǵy qutty bolsyn. Bul bizdiń elimizde nómiri birinshi sport. Táýelsizdik jyldarynda ǵana 7 Olımpıada oıyndarynyń chempıony shyqqan. «Astana Arlans» komandamyz «Búkilálemdik boks serııasy» týrnıriniń 3 dúrkin jeńimpazy. Qaı óńirimizdi alyp qaraǵanda talaı myqty sportshylarymyz bolǵan, bola beredi de», - dep atap ótti «Astana Arlans» kásipqoı boks klýbynyń bas menedjeri, 2004 Afına Olımpıadasynyń chempıony, Barker kýbogynyń ıegeri Baqtııar Artaev.
«Barsha sportsúıer qaýymdy qazaq boksynyń 85 jyldyǵymen quttyqtaımyn. Bul mereıli kúnde biz sport ardagerlerin, bokstyń damýyna úlken úles qosqan azamattardy eske alamyz. Solardyń eńbekterin jastarǵa nasıhat qylyp aıtamyz», - dedi Mereı Aqshalov.
Jas ta bolsa bas bolyp júrgen aǵaıyndy Aıbek pen Nurbek Oralbaı da kópshilikpen birge sýretke túsip, jınalǵan jurttyń kóńilin taýyp jatty. Biri bıyl Býdapeshtte ótken Álem chempıonatynyń jeńimpazy, biri Jasóspirimder Olımpıadasynyń kúmis júldegeri.
