Jaqynda Mádenıet jáne sport mınıstrliginiń qoldaýymen Astanadaǵy Ulttyq mýzeıde Qazaqstan Respýblıkasynyń eńbek sińirgen qaıratkeri, belgili qylqalam sheberi Alpysbaı Qazǵulovtyń «Kóńil kóktemi» atty kórmesiniń saltanatty ashylýy bolyp ótti. Kórmege «Ájemniń úıi», «Asaýdy aýyzdyqtaý», «Sharyn shatqalyna shyǵý», «Ystyq kún», «Kútpegen kezdesý», «Dala áýeni» syndy barlyǵy 140-tan asa sýret qoıylyp, tamashalaýshysyn tańǵajaıyp álemniń tuńǵıyǵyna boılatty.
Alpysbaı Qazǵulovtyń kartınalarynda sýrettelgen shynaıy ómir kórinisteri jaı ǵana kóshirme emes, ol – has sheberdiń qylqalamyna ǵana tán ózindik jeńil mánermen berilgen sezim men syrǵa toly naǵyz óner týyndylary. Sondyqtan da bolsa kerek, sýretshi shyǵarmalarynda tereń bilim, taǵylymdy ómirlik tájirıbemen qatar, qylqalam ıesiniń jan tebirenisteri men kórkem álemi de saırap jatady. Kásibı sheberligin aıtpaǵanda, sýretshi kóńil kúıdiń ásem kórinisterin ǵalamat bir sheberlikpen ásem úılestiredi.
«Maǵan osy bir adam unap qaldy: sýretteri aldaǵan joq – rasymen de zaman talabyna, sondaı-aq tolyǵymen dástúrge saı oılanady eken. Onyń qylqalamynan shyqqan týyndylar pishini jaǵynan «modernıstik», alaıda qozǵaǵan taqyryptary baıaǵydaǵydaı. Alpysbaı dala, aýyl, qora-qopsy syndy taqyryptarmen shektelgen sııaqty bolǵanymen, shyn máninde óz sýretterine qandaı da bir ǵaryshtyq deńgeı bere otyryp, bizdiń sanamyzdyń sheńberin keńeıte túsedi» dep jazypty óz esteliginde Shyńǵys Aıtmatov.
Rasymen de, uly qalamger baǵalap ótkendeı, tamashalaýshy qııal ıesiniń jumysymen alǵash tanysqan sátinen-aq aınymas dosqa aınalyp, birden syrlasyp ketedi. Sýretshi qandaı jumbaq bolsa, dál sondaı qarapaıym da. Onyń eńbekterinde sulýlyq pen tazalyqtyń ısi ańqyp turady. Dál tańdalyp, qanyq bederlengen kórkem álem kózdi arbap, tuńǵıyǵyna tartyp ala jóneledi.
«Qylqalamǵa ǵana arnaǵan osynaý 42 jyldyq shyǵarmashylyq ǵumyrymda barlyǵy 5000-nan asa kartına salǵan ekenmin. Bul tek sany ǵana emes, olardyń árqaısysy mazmundyq turǵydan san alýan. Áıtse de adamda arman taýsylǵan ba?! Alla ǵumyr berse, endi osy 5000 týyndymdy on oraıtyn eń úzdik degen keminde 5 kartına týdyrsam deımin», – deıdi sýretshi.
Ras, adam bar jerde arman bar. Ol ásirese, qııalǵa baı sýretshi áleminde tipti bıik. Alpysbaı Qazǵulov shyǵarmashylyǵymen tanysyp, kóńil kóktemine saıahattap qaıtqan ǵalamat saparymyzda biz osyǵan kóz jetkizdik.
P.S: Alpysbaı Qazǵulovtyń «Kóńil kóktemi» kórmesi Qazaqstan Respýblıkasynyń Ulttyq mýzeıinde 2018 jyldyń 12 jeltoqsanyna deıin jalǵasady.
Nazerke JUMABAI,
«Egemen Qazaqstan»
