Jer kezegine turý, memlekettik qyzmetter men servıster týraly aqparat ta osynda kórsetilgen. Bul – Elbasy tapsyrmasymen qolǵa alynǵan «Sıfrly Qazaqstan» memlekettik baǵdarlamasynyń jemisi. Oblys ákimdiginiń qoldaýymen oblys ákimi apparatynyń Ahýaldyq ortalyǵynyń tapsyrysy negizinde jasaqtalǵan Atyraý oblysynyń geoaqparattyq portaly – aımaqtyń túrli baǵyttaǵy qyzmetterin qamtıtyn, ár nysannyń áleýmettik, kóliktik, ınjenerlik ınfraqurylymy týraly derekteri ornalastyrylǵan oblys pen qalanyń alǵashqy elektrondy kartasy.
Geoportaldy derbes kompıýtermen qatar, Android jáne iOS negizindegi kez kelgen uıaly qurylǵydan «Smart Atyraý» qosymshasy arqyly qaraýǵa bolady. Qala turǵyndary men qonaqtary Atyraýǵa qatysty barlyq aqparatty osy portaldan ala alady. Al «Joldaýlar» servısi arqyly aımaqty basqarý úrderisterine qatysý múmkindigi qamtamasyz etilgen. Kez kelgen qyzyǵýshy Atyraý qalasynyń bas josparymen tanysýyna bolady. Áleýetti ınvestorlar úshin maqsattary, jalpy somasy, qazirgi ahýaly men artyqshylyqtary sıpattalǵan jobalar jarııalanǵan.
Portaldaǵy oblysta ótetin jer aýksıondary men konkýrstar týraly aqparattyq jarııalanymdar kásipkerlerge paıdaly ekeni sózsiz. О́ıtkeni onda satylymǵa shyǵarylǵan jer telimderiniń ornalasqan jeri men qatysý sharttary, ótinim qabyldaý oryndary da kórsetilgen. Sol arqyly qatysýshy jer teliminiń artyqshylyqtaryn bile alady.
«Sıfrly Qazaqstan» baǵdarlamasy aıasynda júzege asqan bul joba aqparattyń qoljetimdi bolýyna, usynylatyn qyzmetterdiń sapasyna, sybaılas jemqorlyqtyń aldyn alýǵa baǵyttalǵan. Jyl sońyna deıin oblys halqyna geoportalda jer qatynastary, sáýlet jáne qala qurylysy salalarynda 20-ǵa jýyq elektrondy qyzmet alý boıynsha servıster usynylady. Bul jer telimderin, tehnıkalyq sharttardy, sáýlet-josparlaý tapsyrmasyn berý sekildi ótinim beretin rásimderdi jeńildetedi.
Memleket basshysy bıylǵy Joldaýynda «Jer qatynastary men qurylys salasyndaǵy bıýrokrattyq rásimder jurtshylyqty mazalaıtyn máselelerdiń biri bolyp sanalady. Bul salada ashyqtyq joq, halyq pen bıznes aqparatqa tolyq qol jetkize almaı otyr. Jer qory men jyljymaıtyn múlik nysandary týraly málimetterdiń biryńǵaı aqparattyq bazasyn jasaýdy tapsyramyn. Jalpy, 2019 jyly kórsetiletin memlekettik qyzmetterdiń 80 paıyzy, al 2020 jyly keminde 90 paıyzy elektrondy formatqa kóshirilýge tıis», dep atap kórsetti. Atyraýdyń alǵashqy geoportaly da osy maqsatta qolǵa alynǵan joba retinde halyqtyń kóńilinen shyǵady degen senim bar.
Baqytgúl BABASh,
«Egemen Qazaqstan»
ATYRAÝ
