Senat komıtetiniń tóraǵasy Birǵanym Áıtimova sharany asha kelip, Elbasy Nursultan Nazarbaev mektepke deıingi tárbıe máselesine erekshe mán beretinin atap ótti. Memleket basshysy «Qazaqstan-2050» Strategııasynda mektepke deıingi bilim berýdiń jańa ádisterine kóshý qajettigine nazar aýdarǵan bolatyn. «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda balalardyń erte damýy úshin óz betinshe oqý mashyǵy men áleýmettik daǵdysyn damytatyn baǵdarlamalardyń biryńǵaı standarttaryn engizý boıynsha tapsyrma berildi. Qazan aıyndaǵy Joldaýda da mektepke deıingi bilim berý sapasyn túbegeıli jaqsartý qajettigi atap ótildi. «Bilim berý isinde 4K modeline: kreatıvtilikti, synı oılaýdy, kommýnıkatıvtilikti damytýǵa jáne komandada jumys isteı bilýge basty nazar aýdaryldy. Osyǵan baılanysty biliktilik talaptary, oqytý ádisteri, tárbıeshilerdiń jáne balabaqshadaǵy basqa da qyzmetkerlerdiń eńbegine aqy tóleý júıesi qaıta qarastyrylyp, tıisti «jol kartasy» ázirlenetin bolady», - dedi B.Áıtimova.
Bilim jáne ǵylym mınıstri Erlan Saǵadıev 2018 jylǵy 5 qazandaǵy Joldaýdy iske asyrý úshin mınıstrlik mektepke deıingi bilim berýdiń sapasyn arttyrý, onyń ishinde biryńǵaı biliktilik talaptaryn engizý, ulttyq biliktilikti testileý jáne mektepke deıingi mekemelerdegi tárıbıeshiler men basqa da qyzmetkerlerdiń eńbegine aqy tóleý júıesin qaıta qaraý jónindegi Jol kartasynyń jobasyn ázirlegeni týraly senatorlardy habardar etti.
Attestasııalaýdyń jańa sıpaty (ulttyq biliktilikti testileý) boıynsha tárbıeshilerdiń eńbekaqysyn arttyrý, sábıhanalarda jumys isteıtin tárbıeshiler men kútýshilerge qosymsha aqy engizý josparlanyp otyr.
Sondaı-aq mektepte oqytýmen birdeı 0 synyptarynda jańartylǵan baǵdarlama boıynsha jumys isteıtin ustazdarǵa da qosymsha aqy qarastyrylyp otyr.
Balalardy qamtý aıasyn keńeıtý úshin 2019 jyly 62,4 myń oryndyq, onyń ishinde 47,8 myń orynǵa 421 jekemenshik mektepke deıingi uıymdar ashý josparlandy. Bul rette 8,5 myń oryn 1-3 jastaǵy balalarǵa arnalady.
Mınıstr atap ótkendeı, balalar ómiri men densaýlyǵyn qorǵaý mektepke deıingi uıymdardyń negizgi mindetteriniń biri jáne mektepke deıingi bilim berý sapasynyń kórsetkishi bolyp tabylady. Balalardyń qaýipsiz jaǵdaıda bolýy maqsatynda mınıstrliktiń bilim berý uıymdaryn jabdyqtaý jónindegi buıryǵy boıynsha 3 589 (58 paıyz) balalar baqshasyna 40452 beıne kamera ornatyldy.
Mektepke deıingi tárbıe men oqytýdyń ózekti máselelerin jan-jaqty talqylaǵannan keıin B.Áıtimova bul saladaǵy jumystar odan ári jalǵasatynyn atap ótti. Áleýmettik-mádenı damý jáne ǵylym komıteti aldaǵy jyly «Qazaqstan Respýblıkasynyń mektepke deıingi jáne orta bilim berý máseleleri boıynsha zańnamasyn odan ári jetildirý» taqyrybyna arnalǵan dóńgelek ústel otyrysyn ótkizetin boldy.
