Túrkistan oblysyn damytý jónindegi Elbasy tapsyrmasy boıynsha jasalǵan arnaıy josparǵa sáıkes, memlekettik-jekeshelik áriptestik aıasynda oblys ortalyǵynda kópsalaly aýrýhana boı kóteredi. Qazirdiń ózinde ony salýǵa qyzyǵyp otyrǵan ınvestorlar bar. Oǵan qosa qarjy ortalyqtarymen, Damý bankimen kelissózder júrgizilýde. Týrıster kóptep keletindikten halyqaralyq deńgeıdegi jańa aýrýhana qajettigi de týyndap otyr.
Bul jóninde Densaýlyq saqtaý mınıstri Eljan Birtanov Túrkistan oblysyna kelgen sapary barysynda aýdandyq aýrýhanalardyń bas dárigerlerimen, túrli medısınalyq uıymdardyń basshylarymen ótkizgen jıynda málim etti. Mınıstrdiń aıtýynsha, endi úlken emhanalar salynbaıdy. Onyń ornyna memlekettik-jekeshelik áriptestik aıasynda salynǵan mekemelerde turǵyndarǵa jaqyn jerden ýchaskelik dárigerler qyzmet kórsete bastaıdy. Odan bólek turǵyndarǵa dárigerler smartfondar arqyly keńes beredi. Túrkistan qalalyq emhanasynda mınıstr medısınalyq mekemeniń jumysymen tanysyp, atalǵan uıymnyń qaǵazsyz qyzmet kórsetý júıesine kóshkenine kóz jetkizdi.
Emhana bas dárigeriniń orynbasary Baqytjan Júzjasarovtyń aıtýynsha, emhanaǵa tirkelgen turǵyndar burynǵydaı medısınalyq kartasyn izdep, qaǵaz tasyp júrmeıdi. Dárigerge qaralýdan bastap barlyq qyzmet túri elektrondy qujat boıynsha júzege asady. Tabaldyryq attaǵannan qarsy alatyn qyzmetker aldyndaǵy monıtorǵa qarap-aq suranysyńyzdy óteıdi. Bul úshin pasıent jeke kýáligin kórsetse boldy. Kelesi bir maman sıfrlandyrý júıesiniń qyzmetin pasıentterge túsindirip, medısınalyq mobıldik qosymshany smartfonyna ornatyp beredi. Onyń qasynda qart kisilerge kómegin usynatyn taǵy bir maman jumys isteıdi. Engizilgen jańashyldyqtarmen tanysqan mınıstr pasıentterdiń buǵan deıingi kartotekasyn saqtap qoıýdy, keı jaǵdaıda qajet bolyp qalýy da múmkin ekenin eskertti. Sondaı-aq Eljan Birtanov dárigerler men medbıkelerdiń biliktiligin arttyrý, medısınalyq qyzmetterdiń sapasyn jaqsartý máselelerin sóz etti. Alǵashqy medısınalyq kómek kórsetýdi damytý qajettigin jetkizdi. Mınıstrdiń aıtýynsha, búginde bir ýchaskelik dárigerge 2500-3000 adamnan qaralady. Keleshekte ol júkteme 1500-ge túsirilmek.
Ǵalymjan ELShIBAI,
«Egemen Qazaqstan»
Túrkistan oblysy
