Bul jóninde Túrkistan oblysynyń ákimi Janseıit Túımebaev Ortalyq kommýnıkasııalar qyzmetiniń Túrkistan qalasynda ótkizgen kóshpeli baspasóz konferensııasynda málimdedi. «Elbasy Joldaýy men «Rýhanı jańǵyrý» baǵdarlamasyn júzege asyrý jáne Túrkistan qalasyn damytý barysy» taqyrybyndaǵy baspasóz máslıhaty jańa formatta ótti. Q.A. Iаssaýı kesenesi aldynda ótken kóshpeli otyrysta oblys ákimi óńirdiń ekonomıkalyq-áleýmettik ahýalyna keńinen toqtalyp, jýrnalıster saýalyna jaýap berdi.
Túrkistan qalasynda jańa qurylystardyń sáýlet stıli jergilikti ulttyq salt-dástúrge súıenetin bolady. Elbasynyń Túrkistan oblysyna is-sapary barysynda, birqatar ulttyq kompanııalarǵa, bıznes ókilderi men shet elderdiń ınvestorlaryna 16 nysandy salý boıynsha usynystar jasalynǵan bolatyn.
Sondaı-aq respýblıkalyq mańyzy bar qalalardyń jáne oblys ákimdikterimen 13 qurylys nysanyn salý kózdelip otyr. Mysaly, «ERG» kompanııasy «Túrki álemi» ortalyǵyn, «Bazıs –A» holdıngi qazaq drama teatryn, «SembolConstruction» AQ-y týrıstik baǵyttaǵy kolledj, «Qazaqmys korporasııasy» JShS-i «Uly Dala eli» ortalyǵyn salatyn bolady. Sonymen qatar, Túrkistan qalasynyń damýy boıynsha 2018-2021 jyldarǵa arnalǵan Damý tujyrymdamasy jasalynyp, qalany tarıhı-kıeli, qurylys salýdy retteý, ákimshilik-iskerlik ortalyǵy syndy 3 aımaqqa bólip, damytý jumystary ázirlenýde. Jańa áýejaı qurylysy júrgiziletin aýmaq ta belgilengen.
Jýrnalısterdiń suraǵyna bergen jaýabynda oblys ákimi óńirde 28 myń adam baspana kezeginde turǵanyn aıtyp ótti. Turǵyndardy baspanamen qamtamasyz etý maqsatynda óńirde 73 kópqabatty turǵyn úı qurylysy júrgizilýde. Sondaı-aq aýdandarda da kópqabatty úıler salý qolǵa alynǵan. Mysaly Tólebı aýdanynyń ortalyǵynda 480 páterli 8 kópqabatty turǵyn úı paıdalanýǵa berilgen. Saryaǵashta 13 kópqabatty turǵyn úı salynýda. Tabıǵı ósimi joǵary óńirde balabaqsha, mektep salý máselesi kún tártibinen túsken emes. Balabaqshamen qamtý qazir 84 paıyz bolyp otyr. Al 8 apatty, 7 úsh aýysymdy mektep máselesi birtindep sheshimin tappaq. Oblys aýmaǵyndaǵy samanmen salynǵan mektepterdi jańartý da ýaqyt enshisindegi másele. Sondaı-aq oblys ákimi brıfıngte jyl basynan bergi 9 aıda atqarylǵan jumystarǵa keńinen toqtaldy.
Ǵalymjan ELShIBAI,
«Egemen Qazaqstan»
Túrkistan oblysy.
