Gazet – úkimet tili, jurt aınasy. El men úkimetti sóılestirip otyratyn elshisi. Eńbekshi eldiń joǵyn izdeıtin joqshysy. Qamyn jep qaıǵyratyn qamqory. Jol kórsetip, jón siltep, adasqanyn aıtyp, qonys izdeıtin kóshbasshy qarııasy. Sonyń bárin moınyna alyp otyrǵan gazet jazýshy jáne tilshilermen kórkeıip, oqýshylarmen ulǵaımaq.
Mádenıetten kenje qalǵan sany 6 mıllıon shamalanǵan qazaq eliniń ortalyq jalǵyz gazeti «Eńbekshi qazaq» búgin tusaýyn kesken baladaı tórt jasty jasap, bes jasqa shyǵyp otyrsa da, sany on myńǵa, belgili tilshileri bir myńǵa jetken joq. Árıne, bul bizdiń qazaq azamattarynyń gazet isine sýyq qaraǵandyǵyn kórsetedi.
Bizdiń el adamdarymyz túgil, qyzmettegi azamattarymyzǵa gazetke jazylyńyz deseńiz, keıbireýleri: «Pul tólemeı-aq oqyp júrmin», deıdi. Budan bolystyq, aýyldyq keńselerge arnalǵan gazetterdi jolsoqty qylatyny kórinedi.
Qoly hat biletin qyzmettegi azamattarymyzdyń kóbi gazetke habar jazǵandy ar kóredi. Gazet tilshilerin ósekshil dep keketip te júredi. Budan ol azamattarymyzdyń saıası saýatsyzdyǵy, áleýmet isine berilmegendigi, qara basynyń qamyn izdegen ózimshil nadandyǵy kórinedi.
Bizdiń aıtarymyz:
1. Qoly hat biletin qazaq azamattarynyń kórgen-bilgen habaryn jazyp, basqarmaǵa jiberip turý mindeti. Sondyqtan olar jazyp turýy kerek.
2. El ishinen tilshiler belgilenip, olarǵa basqarmadan nusqaýlar jiberilip turýy kerek. Qalalardan tilshiler uıymy ashylýy kerek.
3. Qyzmette júrgen qazaq azamattary istep júrgen isinde qazaq eline kelgen paıdany, zııandy kúndelik tájirıbesinen bilip, qazaq eliniń turmysyn jóndeý týraly pikirlerin jazyp turýlary kerek.
«Eńbekshi qazaq» kúndelik gazet bolsyn.
Qyzmettegi qazaq azamattary «Eńbekshi qazaqqa» jazylýǵa mindetti bolsyn.
El ishinen jazylýshylar jınalyp, olarǵa gazet jolsoqty bolmaı tııýine qatty shara qarastyrylsyn.
«Eńbekshi qazaq» 6 jasqa shyqqanda tilshileri bes júzge, tırajy jıyrma bes myńǵa jetsin.
Daıyndaǵan Ularbek NURǴALYMULY,
«Egemen Qazaqstan»
