Oblystyq memlekettik rámizder jónindegi komıssııanyń kezekti otyrysynda oblys ákimi Qyrymbek Kósherbaev memlekettik rámizderdiń jastarǵa patrıottyq tárbıe berýdegi mańyzdylyǵyn aıtty.
- Memleket basshysy atap ótkendeı, «Memlekettik rámizder-ulttyń rýhy men sanasy, onyń erligi men kóregendiligi, bolashaqqa degen senimi, umtylystary men qıly taǵdyrynyń beınesi». Sondyqtan, Qazaqstan Respýblıkasynyń Memlekettik rámizderin qurmetteý – elimizdiń árbir azamatynyń paryzy, - dedi ol.
Jıynda oblystyq ishki saıasat basqarmasynyń basshysy Talǵat Mahanov aımaqtyq uıymdar men mekemelerdegi memlekettik rámizderdiń standartqa saı qoldanylýy men ornalastyrylýyndaǵy kemshilikter týraly baıandady.
- Memlekettik rámizderge baılanysty túsindirý jumystary, semınarlar ótkizilip, memlekettik rámizderdi ornalastyrý men qoldanýda kemshilikterdi jibermeý jóninde hattamalyq tapsyrmalar berilgenimen, kemshilikter áli de qaıtalanyp keledi. Aldaǵy ýaqytta mundaı ketken kemshilikterdi tez arada joıý jáne halyqtyń kózine oǵash kórsetpeý maqsatynda anyqtalǵan kemshilikterdi sýretke túsirip, salyp otyratyn «Ramiz.kzo» chaty jumys jasaıtyn bolady. Onda memlekettik rámizderdi qoldanýda jiberilgen kemshilikter talqylanyp, mekeme basshylaryna shuǵyl túzetý usynylady jáne kemshilikti túzetkendigi jóninde esebi de usynylatyn bolady,-dedi oblystyq ishki saıasat basqarmasynyń basshysy.
Baqtııar TAIJAN,
«Egemen Qazaqstan»
Qyzylorda oblysy
