Qazaqstandaǵy mal sharýashylyǵynyń búgingi jaı-kúıi týraly talqylaǵan mamandar álemdik trendter, respýblıkadaǵy azyq-túlik sektorynyń damý keleshegi týraly pikirlerin ortaǵa salyp, sheteldik kompanııalardyń agrotehnologııalyq jetistikterdi qalaı paıdalanatyndyǵy jáne qazaqstandyq agrarıılerdiń sheteldik naryqqa shyǵýyna qatysty máselelermen bólisti.
«KazBeef Ltd.» kompanııasynyń dırektory Beıbit Erýbaev elimizdiń mal sharýashylyǵy áleýetiniń munaı óndirisinen kem túspeıtin dárejede damı alatyndyǵyna qatysýshylardyń nazaryn aýdardy. Ol úshin bilim transferi, ınvestısııalar men zamanaýı tehnologııalardy qoldaný jetkilikti. Qazaqstan tarıhy jaǵynan da, geografııalyq múmkindikterimen de sharýashylyqty damytýda álemdik kóshbasshy deńgeıine kóterilýge múmkindigi zor. Jańa tehnologııalardy ıgerýde ózara tájirıbe almasý, ınfraqurylymdyq, veterınarııa, sanepıdemıologııa salasyna qatysty táýekelder keshendi túrde sheshimin tabýy qajet.
Dóńgelek ústel barysynda qazaqstandyq jáne halyqaralyq kompanııalar ókilderi pikir almasty. Nıderlandtan kelgen ǵalymdar óz tájirıbelerin ortaǵa saldy. Osylaısha sala mamandary mal sharýashylyǵy salasyndaǵy álemdik trendtermen bólisip, Qazaqstandaǵy agrarlyq azyq-túlik naryǵynyń máselelerin, onyń ishinde otandyq et-sút sektoryn damytýǵa arnalǵan ınnovasııalyq bıo jáne agrotehnologııalardy qoldaný arqyly salanyń áleýetin arttyrýdaǵy múmkindikterdi qarastyrdy. Sonymen qatar aýyl sharýashylyǵy ónimderiniń baǵasyn tómendetý, energııa kózderin únemdeý maqsatynda «jasyl» tehnologııalardy paıdalaný, qaldyqtardy bıogazsyz qaıta óńdeý óndirisiniń mańyzdylyǵy týraly pikir almasty.
Dóńgelek sútel barysynda qozǵalǵan taǵy bir mańyzdy másele mal sharýashylyǵyn júrgizýdiń ozyq ádisterin paıdalanýǵa baılanysty jasandy jolmen uryqtandyrý, janýarlardyń saýlyǵyna monıtorıng júrgizý, mal basyn elektrondyq esepke alý, egistikke jerserik arqyly saraptama jasaýǵa qatysty tájirıbelerimen bólisken mamandar yntymaqtastyq aıasyn keńitip, ózara kelisimsharttar arqyly salanyń damýyna yqpal etetin bolady.
Elvıra SERIKQYZY,
«Egemen Qazaqstan»
ALMATY
