«Barys Arenada» ótken matchtyń 3-mınýtynda astanalyq oıynshy Anton Sagadeev esep ashsa, kóp keshikpeı Ionas Enlýnd tarazy basyn teńestirdi. 28-mınýtta Anton Glınkın qonaqtar komandasyn alǵa shyǵardy. Bul esep uzaqqa deıin saqtaldy. Sol ýaqyt aralyǵynda qos klýbtyń oıynshylary san márte keremet shabýyldar uıymdastyrǵanymen, qaqpa kiltin taba almady.
Al 55-mınýtta Aleksandr Rybakov nysanany taǵy bir márte dál kózdegen sátte «endi jaǵdaıdy ózgertý múmkin emes» dep oılaǵanymyz ras. Alaıda jankeshtilik tanytqan aıdyn ıeleri bir jarym mınýt aralyǵynda eki márte mergendik tanytyp, jergilikti jankúıerlerdi bir shattandyryp tastady. Bul goldardyń avtorlary – Darren Dıs pen Patrıs Korme. Biraq overtaımda «Traktordyń» baǵy jandy. Aleksandr Sharov soqqan shaıba Chelıabiden kelgen komandaǵa jeńis áperdi. Esep – 3:4.
Qazirgi kezde «Barys» turaqty birinshiliktiń jarys kestesinde 7 orynda keledi. 22 kezdesýden keıin jerlesterimiz 33 upaı jıyp otyr. Erteń astanalyqtar Mınskige sapar shegip, jergilikti «Dınamo» klýbymen sheberlik baıqasady.
Ǵalym SÚLEIMEN,
«Egemen Qazaqstan»
