Bıyl «Azııa Agrohım» jaýapkershiligi shekteýli seriktestiginiń dırektory Borıs Kozlovtyń demeýshiliginiń arqasynda mazardyń mańaıy ádemilep qorshaldy, tóbe basyna jıekteı kóteriletin jol salyndy. Mazarǵa kelip minájat etken adamdar jaıǵasyp, demalatyn ornyqty oryndyqtar qoıyldy. Mazar tóńiregi abattandyrylyp, tap-tuınaqtaı etilip tazalanyp, kórkeıip qaldy.
– Buryn mazar salynbaı turǵanda hannyń altyn-kúmisin izdegen áldekimder talaı ret qazyp, berekesin ketirgen eken, – deıdi Borıs Kozlov, – endi mine Kókshetaýǵa at izin salǵan, el tarıhyn etene bilgisi keletin adamdardyń at basyn buratyn jerine aınalyp otyr. Han mazary qaraýsyz qalsa, keıingilerge syn emes pe?
Seriktestik basshysynyń ataly sózi jerde qalmady. Jaqsy isi jalǵasyn taýyp, ile aǵash otyrǵyzý jumystary júrgizildi. Oǵan Kóksheniń aqsaqaldary, Ýálı hannyń óz urpaqtary, Naýan haziret atyndaǵy oblystyq meshittiń, oblystyq tarıhı-ólketaný mýzeıiniń ujymdary atsalysty.
Baıqal BAIÁDIL,
«Egemen Qazaqstan»
Aqmola oblysy
