100 jańa esim Respýblıkalyq konkýrsyna arnalǵan baspasóz konferensııasyna Aqparat jáne kommýnıkasııalar vıse-mınıstri N.Maýberlınova men «Qazkontent» AQ tóraǵasy D.Qojahmetov qatysty. Jıyn barysynda ótken jylǵy joba jeńimpazdarynyń jetistikteri aıtylyp, jańa daýys berý kezeńiniń bastalǵany jarııalandy. Sondaı-aq Aqparat jáne kommýnıkasııalar vıse-mınıstri N.Maýberlınova Mınıstrliktiń Jol kartasynyń tizimine kirgen jobalar týraly aıtyp ótti.
«О́tken jyly 1 qańtarda «Qazaqstannyń 100 jańa esimi» jarııalanǵan bolatyn. Joba qorytyndysy boıynsha 102 jeńimpaz anyqtaldy. Búginde olar ártúrli qyzmet salasynda jańa jetistikterge jetip, ıdeıalary men jobalaryn damytyp keledi. Jeńimpazdar usynǵan 17 áleýmettik mańyzy bar joba Mınıstrlik ázirlegen Jol kartasy tarapynan qoldaý tapty», dedi vıse-mınıstr.
Qazaqstan halqy Assambleıasy men Aqparat jáne kommýnıkasııalar mınıstrliginiń birlese uıymdastyrǵan «Qazaqstannyń 100 jańa esimi» jobasy bıyl óz jalǵasyn tapty. Jıyn barysynda «Qazkontent» AQ basqarma tóraǵasy D.Qojahmetov jobanyń ekinshi kezeńindegi úmitkerlerdi tirkeý aıaqtalǵanyn atap ótti.
«Prezıdentimiz «Bolashaqqa baǵdar: rýhanı jańǵyrý» maqalasynda «100 jańa esim» jobasy arqyly elimizdiń ár óńirinde turatyn túrli jastaǵy azamattardyń jetistikterine nazar aýdarýdy usyndy. Sonyń negizinde ótken jyly birqatar jumystar atqaryldy. Daryndy azamattardyń ómirbaıanyn úlgi etý arqyly jastardy tárbıeleýde bul jobanyń mańyzy erekshe. El arasynda keń taraǵan jobanyń ekinshi kezeńi óz jumysyn bastady. Jobanyń birinshi kezeńi boıynsha 2388 kandıdat tirkeldi. Sonyń ishinde 200 adam barlyq talaptarǵa sáıkes kelip, ekinshi kezeńge ótti», dedi D.Qojahmetov.
Onlaın daýys berý 100esim.el.kz saıtynda 2-15 qarasha aralyǵynda ótedi. Daýys berý prosesi úmitker saıtqa tirkelgennen keıin júzege asady. Odan soń paıdalanýshy poshtasyna kelgen kodty aktıvtendirý kerek. Árbir kategorııa boıynsha daýys berýshi úsh daýystan bere alady. Joba nátıjesi resmı saıtta jarııalanady.
Marjan TILEÝBEK,
«Egemen Qazaqstan»
