«Spandııar Kóbeevtiń atyna dárishana berý kópten oılastyryp júrgen sharýa bolatyn. Bul kerek is. О́kinishke qaraı bilim salasynyń qaıratkerlerin, belgili ustazdardy jastar bile bermeıdi. Dárishana atyn berý bizdiń halqymyzdyń ulylaryn umyttyrmaı, jastarǵa nasıhattaýdyń bir túri dep bilemiz. Bizdiń ýnıversıtette mundaı is jalǵasyn tabatyn bolady», dedi Erkin Amanjoluly.
« Ybyraı Altynsarınnen bilim alǵan, izin jalǵaǵan ustazdar Qostanaı jerinde az bolmaǵan. Olardyń kóshin ulttyń uıtqysy bolǵan Ahmet Baıtursynov, Mirjaqyp Dýlatov, Eldes Omarov bastady, olardy Spandııar Kóbeev, Beket О́tetileýovter jalǵady. Spandııar Kóbeevtiń alǵashqy kitabyna kóńil bólsek, ol «Úlgili bala, úlgili tárjima» dep atalady. Ol kisi bilimmen birge balanyń tárbıesine kóp kóńil bólgen. Bul Ál-Farabı babamyzdyń «tárbıesiz bergen bilim qaýipti» degen oıymen úndes», dedi aqyn Aqylbek Shaıahmet.
Dárishananyń ashylý saltanatynda Spandııar Kóbeevtiń inisi Ospannan taraǵan Maǵysh Ǵaripqyzy, aqyn Serikbaı Ospanov, tarıh ǵylymdarynyń doktory, professor Amanjol Kúzembaıuly, taǵy basqalar sóılep, aǵartýshy ustazdyń pedagogıkalyq jáne ádebı muralarynyń mańyzy týraly aıtty. Stýdentter Spandııar Kóbeevke arnalǵan óleńderin oqydy, kelýshiler ustazdyń shyǵarmashylyǵyna arnalǵan kórmeni tamashalady.
Dárishananyń ashylý saltanatynan keıin kemeńger ustazdyń urpaqtary atasyna arnap as berip, onyń rýhyna quran baǵyshtady.
Názıra JÁRIMBET,
«Egemen Qazaqstan»,
Qostanaı
