«Sońǵy eki jylda teńge eń tómengi mınımýmyna túskenimen, munaı baǵasy tórt jyldaǵy eń joǵarǵy deńgeıine jetti. Mysaly, eki jyl buryn munaıdyń bir barreliniń baǵasy 45 dollar, ıaǵnı 15300 teńge bolsa, byltyr ol 17000 teńgege jetti. Qazir munaı baǵasy 80 dollarǵa jaqyndady. Al teńgeniń 1 dollarǵa shaqqandaǵy kýrsy 380-ge jaqyndady desek, osynyń nátıjesinde árbir 1 barrel munaı kompanııalaryna 30 400 teńge taza tabys ákeledi. Sóıtip artyq shyǵynsyz, tek teńge kýrsynyń ózgerýimen ǵana munaı salasynyń kompanııalary jalpy el boıynsha trıllıon teńgege jýyq qosymsha taza paıda kórip otyr. Eger osy qarajatty ǵana alatyn bolsa osynyń ózi halyqtyń zeınetaqy qory men depozıttegi salymdaryn ındeksasııalaýǵa erkin jeter edi» deıdi depýtat.
Osy saýalǵa Úkimetten jáne Ulttyq bankten jaýap keldi. Úkimet óz jaýabynda. «Biryńǵaı jınaqtaýshy zeınetaqy qoryn (ári qaraı BJZQ) senimdi basqarý Ulttyq bankke júktelgen. BJZQ-nyń ınvestısııalyq deklarasııasy Ulttyq banktiń qaýlysymen bekitilip, uzaq merzimge shaqtalǵan tabys tabýǵa baǵyttalǵan» deı kelip, osynyń ózi zeınetaqy salymdaryn qunsyzdanýdan qorǵaıtynyn jetkizipti. Sonymen qatar zeınetaqy salymdaryn ulttyq valıýtanyń álsiregen kezderinde qunsyzdanýdan saqtaý úshin 2016 jyldan bastap zeınetaqy aktıvteriniń valıýtalyq úlesi kezeń-kezeńmen arttyrylǵany aıtylǵan. Odan ári zańǵa sáıkes salynǵan zeınetaqylyq jarnalar adamnyń jasy zeınetke jetken ýaqytyndaǵy ınflıasııa deńgeıine arttyrylýmen tolyqtaı tólenetinine kepildik beriletini kórsetilip, Ulttyq qorǵa munaıdan túsetin qarjy esebinen zeınetaqy qoryn ındeksasııalaý Tujyrymdamada qarastyrylmaǵany aıtylady.
Al depozıttik salymdarǵa baılanysty aıtqanda, olardy saqtaý úshin azamattardyń birneshe amaldy qoldanýǵa bolatynyn, sonyń ishinde ekinshi deńgeıli bankterde sheteldik valıýtamen saqtaý múmkindigi baryn meńzeıdi. Sonymen birge salymdardy teńgemen saqtasa ósimi joǵary bolatyny jáne 15 mln teńgege deıingi somanyń saqtalýyna memleket kepildik beretini aıtylǵan.
Al Ulttyq bank tóraǵasy D.Aqyshevtiń jaýaby boıynsha:
Qazaqstan Respýblıkasy azamattaryna olardyń jınaqtaýshy zeınetaqy júıesindegi zeınetaqy jınaqtarynyń ınflıasııa nátıjesinde qunsyzdanýdan saqtalýyna kepildik beredi. Inflıasııa deńgeıi zeınetaqy qorynyń kiristiliginen asyp ketken jaǵdaıda, Úkimet azamattarǵa jınaqtaryndaǵy aıyrmanyń ornyn toltyrady.
Ortaq zeınetaqynyń mólsheri Qazaqstanda jyl saıyn ınflıasııanyń deńgeıinen 2%-ǵa asa otyryp, al bazalyq zeınetaqy jáne járdemaqylar ınflıasııanyń deńgeıine tepe-teń ındeksteledi. Osylaısha zeınetaqy jınaqtarynyń jarnalaryn memleket qunsyzdanýdan qorǵap qoıǵan.
Daıyndaǵan Jaqsybaı SAMRAT,
«Egemen Qazaqstan»
