Baıqaýǵa qatysýshylarǵa Sultanmahmut Toraıǵyrovtyń «Kim jazyqty?», «Qamar sulý» týyndylarynan sahnalyq kórinis, poemalary men óleńderinen úzindi oqý, «О́leń qorjynynan» atty bólimde óleńderin mánerlep oqý jáne aqynnyń ómiri men shyǵarmashylyǵyna qatysty suraqtarǵa jaýap berý syndy sharttar qoıylǵan.
Baıqaýdyń osy sharttaryna laıyqty óner kórsetken oblys ortalyǵyndaǵy №43 mekteptiń qazaq tili men ádebıetiniń muǵalimi Inga Gross 1-shi oryndy ıelendi.
Inga Gross óńirdegi Maı aýdany, Saty aýylynda týyp ósken. О́mirden ótken atasy Otto Grosstyń áke-sheshesi Raıngoldter otbasy soǵys jyldary qýǵyn–súrgin kórdi. Qazaq jerinen pana tapty. Ul-qyzdary, nemereleri qazaq tilinde oqyp bilim aldy.
Al, 2-oryn №25 orta mekteptiń oqýshylary Damıra Túsipbekova men Nur Dáýletqan, 3-shi oryn №30 orta mekteptiń oqýshysy Ajar Keńes pen pedagogıkalyq ýnıversıtettiń 2-kýrs stýdenti Uljan Ábsadyqovaǵa berildi.
Al, 27-qazanda «Sultanmahmuttyń qońyr kúzi» atty qalalyq baıqaýǵa qatysýshylar Baıanaýyldaǵy Toraıǵyr aýylyna jol tartty.
Aýyl mektebinde «Men - qazaq,«qazaqpyn» dep maqtanamyn» atty Sultanmahmut oqýlary kúni ótkizildi.
Qalalyq Mádenıet jáne tilderdi damytý bóliminiń bólim meńgerýshisi Meıram Nuǵymannyń aıtýynsha, jyl saıyn ótetin ádebı baıqaýdyń qatysýshylary baıqaýdan soń aqynnyń ósken jeri Baıanaýyldaǵy Toraıǵyr aýylyna keledi. Aqynnyń kesenesine táý etip, mýzeıin aralatý dástúrge aınalǵan.
Sultanmahmut Toraıǵyrovtyń týǵanyna 125 jyl tolýyna arnalǵan «Sultanmahmuttyń qońyr kúzi» atty qalalyq baıqaý, aqynnyń izi qalǵan týǵan jerine saıahat, mektep oqýshylarmen kezdesýmen jalǵasty.
Baıqaý qatysýshylary Toraıǵyr kóli jaǵasyndaǵy «Murtty qorǵan» atalyp ketken kóne qorymdardy aralap, tarıhı eskertkishter jaıly kórip, bildi.
Farıda BYQAI,
«Egemen Qazaqstan»
Pavlodar oblysy
Baıanaýyl aýdany
