Jańa maýsymdaǵy alǵashqy iri halyqaralyq jarys Qazaqstan komandasy úshin sátti ótti. Bul saıysta qazaqstandyq sportshylar álemdik deńgeıde joǵary oryndarǵa shyǵýǵa daıyn ekendikterin kórsetti.
Osy tusta Abzal Ájiǵalıevtiń 500 metr qashyqtyqta óner kórsetýin erekshe ataýǵa bolady. Ol Olımpıada chempıony qytaılyq Daszınge ǵana (39.915) jol berip, kúmis medaldi jeńip aldy. Aıtpaqshy, Abzal kórsetken 40.136 seýndtyq nátıje Qazaqstannyń jańa rekordy bolyp tabylady. Al saıysta úshinshi oryndy Vengrııadan kelgen Shandor Lıý ıelendi.
"Maýsymnyń bastalýy sátti boldy. Birinshi kúni jartylaı fınalǵa deıin jettim, biraq ókinishke oraı, medal ala almadym. Birinshi kezeńniń sońǵy kúninde fınalǵa jetip, ekinshi oryn aldym. Aqtyq synda úsh Olımpıada chempıonymen júgirdim. Maýsym endi bastaldy, men áli jeńisterimmen qýantamyn dep úmittenemin", - dedi Ájiǵalıev.
1000 metr qashyqtyqta basty fınalǵa Erkebulan Shamuhanov shyqty. Onyń qorytyndy nátıjesi besinshi oryndy kórsetti. Al fınalǵa eki estafetalyq komanda- áıelder jáne aralas komandalar qatysty. Ekeýi de barlyq qatysýshy quramdardyń arasynda besinshi orynǵa ıe boldy. Áıelder komandasyn Anastasııa Krestova, Ásel Taıshmanova, Olga Tıhonova jáne Iong A Kım tanystyrsa, aralas quramda Abzal Ájiǵalıev, Denıs Nıkısha, Anastasııa Krestova, Iong A Kım óner kórsetti.
Aldaǵy kúnderi AQSh-ta ótetin ekinshi kezeńge Ájiǵalıev qatyspaıdy. Onda komandanyń tek bir bóligi ǵana jol tartady. Álem kýbogynyń ekinshi kezeńi 9-11 qarashada Solt-Leık-Sıtıde ótedi. Al atalǵan álem Kýbogynyń úshinshi kezeńi 7-9 jeltoqsanda Almatyda uıymdastyrylady.
