Jalaǵashta «Aqbala» tigin sehynyń jumys jasap turǵanyna on jyldyń júzi bolǵan. Sehty iske qospas buryn arnaıy oqý ornynda oqyp, kásiptiń qyr-syryn meńgergen kásipker búginde kóptegen otbasylarǵa jańa jumys ornyn ashyp berip otyr.
– Bajaılap qarasańyz, bizdiń kóbimizdiń tutynatyn buıymdarymyz ben kıip júrgen kıimimizdiń basym bóligi shet memleketterden eksporttalady. Qazirgi kezde kásipkerler otandyq ónimdi naryqqa molynan shyǵara bastady. Biz de jergilikti ónimdi órkendetýge óz úlesimizdi qossaq degen maqsat bar. Tutynýshy talǵamynan shyǵa bilgenniń nátıjesinde kásipti odan ári dóńgelentýge múmkindik týdy. Kásip ashqan jyldary memlekettik baǵdarlama arqyly jyldyq ústemesi tómen, jeńildetilgen nesıe aldyq. Búgingi tańda suranysqa saı jumys jasap kelemiz, – deıdi seh ıesi.
Ulttyq naqyshta kıimder tigip, tutynýshylardyń kóńilinen shyǵyp otyrǵan seh ıesi aldaǵy ýaqytta bıznesin keńeıtýdi kózdep otyr.
Baqtııar TAIJAN,
«Egemen Qazaqstan».
Qyzylorda oblysy
