Qazaqstan Respýblıkasy Memlekettik ortalyq mýzeıiniń baı kolleksııasyn pash etetin halyqaralyq kórmeniń ashylý saltanatyna eki eldiń memleket basshylary, atap aıtsaq, Dúnıejúzi qazaqtarynyń janynan qurylǵan «Otandastar» qorynyń prezıdenti Nurtaı Ábiqaev, Túrki tildes elder yntymaqtastyq keńesiniń Bas hatshysy – Baǵdat Ámireev, «TÚRKSOI» túrki mádenıetiniń halyqaralyq uıymynyń Bas hatshysy, professor Dúısen Qaseıinov, Túrik Respýblıkasy Prezıdentiniń bas keńesshisi Haydar Ali Yildiz, Qazaqstannyń Túrkııadaǵy Tótenshe jáne О́kiletti elshisi Abzal Saparbekuly syndy tanymal tulǵalar qatysyp, kórmeniń eki el arasyndaǵy mádenı baılanystyń ary qaraı damýyna, halyqtar arasyndaǵy dostyqtyń nyǵaıýyna qosar úlesi zor ekendigin atap ótti. Stambýl Mádenıet jáne týrızm basqarmasynyń dırektory Coşkun Yılmaz, Túrik jáne Islam eskertkishteri mýzeıiniń dırektory Serajetdın Shahın de ózderiniń jyly lebizderin bildirdi.
Ortalyq murajaı dırektorynyń orynbasary Bıbigúl Dandyqaraevanyń habarlaǵanyndaı, Ejelgi kóshpeliler mádenıeti jáne qazaq halqynyń tarıhı-etnografııasy dep atalatyn eki bólimnen turatyn kórmede: búginde Qazaqstannyń ulttyq ıgiligine aınalǵan, álemdik mádenıet jaýharlarynyń biri – 1969 j. Esik qorǵanynan tabylǵan Altyn Adam jáne ejelgi kóshpeli halyqtyń altyn buıymdary (Jalaýly kómbesi b.z.d. IX-VII ǵǵ., Shilikti qorǵany b.z.d. VII-VI ǵǵ., Qarǵaly kómbesi b.z.d. II –I ǵǵ.), Jetisý óńirinen tabylǵan saqtar men úısinderdiń ǵuryptyq zattary – shyraǵdannyń úsh taǵandy bóligi, qazan, ǵuryptyq ydystar, shyraǵdan, tarıhı jáne kórkemdik qundylyǵy teńdesiz jádigerler – XIX – XX ǵǵ. dástúrli kıim úlgileri men zergerlik óner týyndylary, turmystyq buıymdar men sándik-qoldanbaly óner týyndylary usynylyp otyr. Kórme bıylǵy jylǵy 9 jeltoqsanyna deıin jalǵasady, onda uly dalanyń kórkem de áspetti kórkem beınesi kóz jaýyn alady.
Saparbaı PARMANQUL,
«Egemen Qazaqstan»
ALMATY
