AHQO Bırjasy bıyl «Astana» halyqaralyq qarjy ortalyǵyn damytý sheńberinde qurylǵan bolatyn.
Bırjanyń negizgi aksıonerleri – AHQO, GoldmanSachs, Jibek Joly qory, Shanhaı qor bırjasy jáne NASDAQ amerıkalyq bırjasy. Sońǵy atalǵan eki bırja álemdegi eń aýqymdy 5 bırjanyń qataryna kiredi.
Jalpy, AHQO Bırjasynyń aldyndaǵy negizgi mindet el ekonomıkasynyń ıgiligi jolynda ulttyq naryqqa kyzmet etý bolmaq. Onyń ishinde álemniń úzdik tájirıbelerine sáıkes keletin bırja ulttyq kompanııalardy jekeshelendirýge arnalǵan alańǵa aınalýy tıis. Sonymen qatar memlekettik jáne kvazımemlekettik sektordyń oblıgasııalaryn shyǵarý, jeke kompanııalardyń qundy qaǵazdaryn ornalastyrý mindeti de osy Bırjaǵa júktelgen.
«Astana» halyqaralyq qarjy ortalyǵynyń quqyqtyq mártebesi Memleket basshysy 2015 jyly qol qoıǵan konstıtýsııalyq zańmen bekitilgen, al jumys tili – aǵylshyn tili. Bul qarjy ortalyǵynyń jumysyna qatysýshylarǵa 50 jylǵa deıin salyqtyq jeńildikter qarastyrylǵan, sondaı-aq, olar úshin jeńildetilgen valıýtalyq, vızalyq jáne eńbek rejimderi kózdelgen. Bul – qyzmeti aǵylshyn quqyǵyna negizdelgen óńirdegi birden-bir ortalyq. Bul ortalyq Nıý-Iork, Sıngapýr, London jáne Dýbaı qalalaryndaǵy qarjy ortalyqtarynyń úzdik modeli negizinde jumys júrgizedi.
Búginniń ózinde AHQO-ynda Qytaıdyq Damý banki sııaqty ondaǵan halyqaralyq iri kompanııalar tirkelgen. Sonymen qatar Sıngapýr, Gonkong jáne Bays Eýropanyń halyqaralyq brokerlik úıleriniń qyzyǵýshylyǵyn týdyrýda. Dálirek aıtqanda, qazirdiń ózinde Gonkongtaǵy eki iri broker – China International Capital Corporation jáne Shenwan Hongyuan Securities Astana halyqaralyq qarjy ortalyǵynyń múshesi mártebesin ıelengen.
«Astana» halyqaralyq qarjy ortalyǵynyń «jasyl», ıslamdyq jáne ınnovasııalyq qarjy quraldaryn damytýdyń óńirlik ortalyǵyna aınalýǵa tolyq múmkindigi bar.
Qazirgi ýaqytta bul qarjy qurylymynyń tıimdi jumysyn qamtamasyz etý úshin qajetti barlyq quqyqtyq jáne uıymdastyrýshylyq baza jasaqtalǵan.
Serik ÁBDIBEK,
«Egemen Qazaqstan»
