«Polıseıler kún saıyn júk mashınalaryn nemese et, mal alyp bara jatqan adamdardyń qujattaryn tekserip otyrdy. Mashınasyna mal artqan eki turǵynnyń qujattary túgel bolǵan joq, olardy polıseıler ákimshilik jaýapkershilikke tartty», deıdi Oblystyq polısııa departamentiniń Qylmystyq polısııa basqarmasy bastyǵynyń mindetin atqarýshy Erbol Taıbekov.
Mal urlyǵymen aınalysýshylar úshin «mynaý qudaıy kórshim, mynaý aǵaıynym eken» degen adamgershilik sezim bolmaıdy. Denısov aýdanynyń Krasnoarmeıskoe selosynyń turǵyny on qoıdy óziniń qatar otyrǵan týysynyń qorasynan urlap alǵan. Qarasý aýdanyndaǵy Jeleznodorojnoe selosynyń turǵyny kórshisiniń asyl tuqymdy buzaýynyń qoradan shyǵyp ketkenin paıdalana qoıǵan.
– Bul buzaýǵa en-tańba salynbaǵan. Urlanǵan maldy tabýda osy tańbalanbaǵany, en salynbaǵany qıyndyq keltiredi. Turǵyndardyń qansha aýzy kúıse de, malǵa en salýǵa enjarlyǵyn qoımaıdy. Sonymen qatar, kópshilik kisiler maldy óriske bos jiberedi. Urylar ıesiz jaıylyp júrgen maldy ańdıdy. Maly joǵalǵandar polısııaǵa der ýaqytynda habarlamaıdy. Bul da urlyqtyń ashylýyn qıyndata túsedi, – deıdi Erbol Taıbekov.
Qazan aıynyń sońynda Taran aýdanynda óriste júrgen 11 jylqy qoldy boldy. Qazir bul jóninde polıseıler jan-jaqty jumys júrgizip jatyr.
Názıra JÁRIMBET,
«Egemen Qazaqstan»
Qostanaı
