Teatrdyń tutas foıesine taqyryp boıynsha tizbektele ilingen sýretter, eskızder jáne sahnalyq kostıýmderden turatyn kórmeni KSRO halyq artısi Asanáli Áshimov, Qazaqstannyń halyq artısi Sábıt Orazbaev, Qazaqstannyń eńbek sińirgen qaıratkeri, kórnekti teatr sýretshisi Esengeldi Tuıaqov ashyp, Murat Saparovtyń sahna ónerine sińirip kele jatqan eńbegin ár qyrynan atap ótti.
Sýretshi Murat Saparov sanaly ǵumyryn qazaq teatr ónerine, sahnaǵa dekorasııa qoıý isine arnap keledi. О́z isin jetik meńgergen jas maman alǵashqy eńbek jolyn Almaty Nemis teatrynda ssenograf bolyp bastady. Onda «Pıngvıny v Afrıke» (ertegi), Ýkraına rejısseri Oleksandr Irvanestiń «Brehýn», Andreı Krıtenkonyń «Norway.Today» psıhologııalyq kloýnadasy (Germanııa) sekildi ár mazmundaǵy spektakldermen sátti qadam jasady.
Ssenograf, sýretshi 2002 jyldan beri M.Áýezov atyndaǵy Qazaq Memlekettik akademııalyq drama teatrynda qyzmet etedi. M.Saparov búgingi kúni teatrda júrip jatqan 40-qa jýyq spektakldiń sahnalyq sheshimin tabýǵa rejısserlermen birge teń kúsh salyp keledi. Alaıda kóp jaǵdaıda sýretshiniń eńbegi nazardan tys qalyp jatady. «Kózge kórinbeıtin» jumyspen aınalyssa da, spektakl jetistiginiń kilti sýretshiniń qolynda. Sebebi ol bezendirgen sahna spektakldiń «tólqujaty». Shymyldyq ashylǵannan keıin kórermen eń aldymen sahnany – dekorasııany kóredi. Daryndy ssenograftyń qolymen daıyndalǵan dekorasııa tilsiz bolǵanymen, «sóılep» turady. Sondyqtan keıipkerdiń áreketine jan berip, sahnany qozǵalysqa keltiretin sýretshi – spektakldegi eń basty adam. Murat Saparov qarashańyraq teatrdyń sahnasyn 18 jyldan beri erekshe qoltańbasymen árlep keledi.
Teatr sahnasynda ol «Apat», (Apokalıpsıs avt. I.Vovnıanko. rej. Á.Rahımov), «Aqyn. Perishte. Mahabbat» ( avt. Á. Tarazı, rej. Á. Rahımov), «Syǵan serenadasy» (avt. I. Saparbaı, rej. E. Obaev, T. Aralbaı), «Qara kempir»( avt. Á. Ámzeuly, rej. E. Obaev), «Aktrısa» (avt. D. Isabekov. rej. N. Jumanııazov), «Kúnáhar» - «Aı tutylǵan tún» (avt. M. Kárim. rej. O.Kenebaev), «Kúzgi romans» (avt. S. Asylbekuly. rej. Á. Rahımov), «Qudalar» (avt. E.Ýahıtov. rej. Á. Rahımov), «Bákeı qyz» (avt. T. Mámeseıitov. rej. Á.Rahımov), «Qojanasyr tiri eken» (avt. T. Nurmaǵambetov, rej. O. Kenebaev), «Eńlik – Kebek» (avt. M. Áýezov. rej. H. Ámir – Temir), «Shyraq janǵan tún» (avt. N. Orazalın, rej. N. Jaqypbaı), «Qyz muńy»(avt. I. Saparbaı. rej. E. Obaev, T. Aralbaı), «Saǵynysh pen Eles» (avt. S. Balǵabaev, rej. Á. Rahımov), «Shákárim» (avtor jáne rej. Á. Rahımov), «Men ishpegen ý bar ma?» (avt. Iran Ǵaıyp. rej. O.Kenebaev), «Júz jyldyq mahabbat» (avt. D. Isabekov. rej. A. Kákisheva), «Baqyt kilti» (avt. Q. Murat. rej. E. Obaev), «Adasqaq» (avt. Asqar Súleımenov, rej. Á.Rahımov), A. Boranbaıdyń «TTT» teatrynda «Sıýrprız» (avt. Oleg Antonov, rej. Eslám Nurtazın) spektaklderinde kórkem izdenisimen kórermen talǵamynan shyǵyp, halqynyń qoshemetine ıe bolyp, ýaqyt tarapynan joǵary baǵasyn alyp otyr. Teatr ónerine shyn júregimen berilgen sýretshiniń qoıylymdary fılosofııalyq oı tereńdigimen, ýaqyttyń talabyna saı kórkemdik-estetıkalyq izdenisterimen baǵaly.
Aıǵa jýyq júretin kórme sońy konferensııa jumysymen jalǵasyn taýyp, sýretshi M.Saparov stýdentterdiń, teatr kórermenderiniń ssenografııa, dekorasııa, zamanaýı bezendirý isine baılanysty birqatar saýaldaryna jaýap berdi.
Aıgúl AHANBAIQYZY,
ALMATY
