Qazaqstannyń BUU janyndaǵy Turaqty ókili Qaırat Omarov Afrıkanyń múıisinde, sonyń ishinde Erıtreıa, Efıopııa, Djıbýtı jáne Somalı elderindegi teńdessiz oń ózgeristerdi atap ótti. Ústimizdegi jyldyń maýsym aıynda búkil álem Erıtreıa men Efıopııa arasyndaǵy tarıhı tatýlyqqa kýá boldy – eki eldiń basshylary saıası erik-jiger tanytyp, 80 myńnan astam adamnyń ómirin qıǵan 20 jyldyq qarsylasýyn toqtatty.
Bul oqıǵa 10 jyl ishinde aýmaqtyq qaqtyǵystarǵa oraı bólingen Erıtreıa men Djıbýtı arasyndaǵy jaqyndasý jáne joǵary deńgeıdegi alǵashqy baılanystarǵa jol berdi. Ekijaqty kelisimdermen qatar Erıtreıa, Efıopııa jáne Somalı saıası, ekonomıkalyq, áleýmettik jáne mádenı baılanystardy nyǵaıtýǵa jáne óńirlik beıbitshilikti, qaýipsizdikti jáne damýdy yntalandyrý jónindegi kúsh-jigerlerin ornatýǵa kelisti.
BUU Qaýipsizdik Keńesiniń otyrysynda sóılegen sózinde Q.Omarov Afrıkanyń múıizi elderi óńirlik problemalardy sheshýge kúshti adaldyǵyn jáne qabilettiligin kórsetkenin atap ótip, sondaı-aq halyqaralyq qoǵamdastyq óńirdegi oń ózgeristerge qoldaý kórsetýdiń mańyzdylyǵy týraly basa aıtty.
«О́ńirdegi beıbitshilik óńirlik kóshbasshylardyń batyl sheshimderiniń nátıjesi boldy. Bul uzaq sozylǵan shıelenisterdiń, qaqtyǵystar men básekelestiktiń dáýiriniń aıaqtalýyn kórsetedi jáne beıbit, ózara tıimdi yntymaqtastyqtyń jańa dáýirine jol ashady», - dedi Qazaqstan elshisi.
«Dıplomatııa, deldaldyq, senimdi nyǵaıtý jáne dıalog, damýdaǵy ınvestısııalarmen qatar elder arasyndaǵy daýly máselelerdi sheshýdiń senimdi joly bolyp tabylady. Biz Djıbýtı men Erıtreıa arasyndaǵy ózara is-qımyldy qoldaımyz jáne olardy ekijaqty qarym-qatynastarda qalǵan máselelerdi sheshý úshin odan ári kúsh-jiger jumsaýǵa shaqyramyz», - dep qosty Q.Omarov.
Qazaqstan Erıtreıaǵa qarsy sanksııalardy alyp tastaý týraly sheshim úshin daýys bergen kezde, óziniń Afrıkada beıbitshilik pen qaýipsizdikti ornatýǵa degen umtylysyn basshylyqqa aldy. Elimizdiń Qaýipsizdik Keńesindegi jumysynyń osy baǵyty Prezıdent Nursultan Nazarbaevtyń BUU Qaýipsizdik Keńesine óziniń saıası joldaýynda anyqtaǵan 7 basymdyqtarynyń biri boldy.
BUU Qaýipsizdik Keńesiniń Somalı jáne Erıtreıaǵa qatysty sanksııalar jónindegi komıtetiniń tóraǵasy retinde Qazaqstan Erıtreıadan sanksııalardy alyp tastaý týraly Keńes músheleriniń sheshimine eleýli úles qosty. Erıtreıanyń halyqaralyq oqshaýlaný jyldary bul eldiń resmı tulǵalardyń osy jyldyń qyrkúıek jáne qazan aılarynda Nıý-Iorkte sanksııalyq komıtettiń tóraǵasymen alǵashqy baılanystarmen aıaqtaldy. Qazaqstannyń Erıtreıamen yntymaqtastyqty nyǵaıtý jónindegi kúsh-jigeri osy elge qarsy 9 jyldyq sanksııalar rejımi aıaqtalýynyń mańyzdy alǵysharty boldy.
Qazaqstandyq delegasııanyń sanksııalyq komıtettiń basshysy retinde atqarǵan jumysynyń qorytyndylary Qaýipsizdik Keńes músheleri tarapynan joǵary baǵa ıe boldy. Otyrys barysynda Erıtreıa men Djıbýtı delegasııalary Qazaqstanǵa óńirdegi turaqty beıbitshilikti ornatýǵa tolyqqandy qoldaý kórsetkeni úshin alǵysyn bildirdi.
Erıtreıaǵa qarsy sanksııalar 2009 jyly engizilgen bolatyn. BUU Qaýipsizdik Keńesi qabyldaǵan qararǵa qarý-jaraq embargosyn alyp tastaý, jol júrýge tyıym salýdy, aktıvterdi toqtatýdy jáne maqsatty sanksııalardy joıýdy kiredi.
