- Atyraý oblysy qarqyndy damyp keledi. Sońǵy jyldary ekonomıkany dıversıfıkasııalaý boıynsha jumystar júrip jatyr. Dástúrli munaı salasymen qatar aýyl sharýashylyǵyn, týrızmdi damytýǵa kóńil bólinýde. Jańa mekemeler ashylyp jatyr, - dedi Nurlan Noǵaev. - Balyq salasyn damytý da árkez nazarda. Sondyqtan balyq sharýashylyǵy basqarmasyn qurý týraly sheshim qabyldandy.
Oblys ákiminiń sheshimimen qurylym basshysy laýazymyna Artýr Sádibekuly taǵaıyndaldy.
Artýr Sádibekuly eńbek jolyn 2002 jyly Qurmanǵazy aýdany Baıda selolyq okrýginiń bas mamany qyzmetinen bastaǵan. Selolyq okrýg ákimi, Qurmanǵazy aýdandyq ákimdigi ishki saıasat bóliminiń basshysy qyzmetterin atqarǵan. 2013 jyly Atyraý oblysy ákimi apparaty uıymdastyrý-tekserý jáne aqparattyq saraptama bóliminiń bas mamany bolyp taǵaıyndaldy. 2016 jyly Atyraý oblysy ákimi apparaty memlekettik qupııalardy qorǵaý bólimi basshysy laýazymyn atqardy.
Aımaq basshysy oblys aktıvine jańa basqarma basshysyn tanystyryp, memlekettik qyzmet qurylymyndaǵy jumys tájirıbesi men biliktiligin atap ótti.
– Sizdiń tájirıbeńiz ben bilimińiz ózińizge de, ujymyńyzǵa da aldaryńyzǵa qoıylǵan mindetterdi atqarýǵa septigin tıgizerine senemiz. Bul baǵytta kóp jumys isteý kerek. Aımaqtyń balyq salasyndaǵy burynǵy dańqyn qalpyna keltirý kerek. Búginde balyq aýlaýmen jáne óńdeýmen aınalysatyn 17 tabıǵat paıdalanýshy, 2 bekire zaýyty bar. Mindet – balyq ónimderin shyǵarý kólemin kóbeıtý. Balyq sharýashylyǵyn damytý jańa basqarma jumysynyń basym baǵyty bolýy tıis, - dedi Nurlan Noǵaev.
Artýr Sádibekuly óz kezeginde oblys ákimi men jıynǵa qatysýshylarǵa alǵa qoıylǵan mindetterdi sapaly júzege asyrý úshin barlyq tájirıbesi men qabiletin kórsetetinin aıtty.
