Jeńilistiń kermek dámi

Dopty hokkeıden Qazaqstan quramasy álem chempıonatynda tuńǵysh jeńilistiń dámin tatty. Álem­niń on márte chempıony Shvesııa komandasymen arada ótken tartys­ty oıynda el jigitteri nebári bir gol soǵýmen shekteldi.

Dopty hokkeıden Qazaqstan quramasy álem chempıonatynda tuńǵysh jeńilistiń dámin tatty. Álem­niń on márte chempıony Shvesııa komandasymen arada ótken tartys­ty oıynda el jigitteri nebári bir gol soǵýmen shekteldi.

Shvesııa quramasymen ótken kezdesý 1:9 esebimen aıaqtaldy. Qazaq­standyqtar birinshi mınýttardan ash­yq aıqasqa kóshken bolatyn. Alaıda, shvedter óz múmkindikterin múlt ji­ber­meı, óz qaqpasyn qamaldy qorǵa­ǵandaı asqan sheberlikpen saqtaı bil­di. Aıta ketý kerek, Alekseı Nı­kıshovtyń shákirtteri qansha tyrys­qanmen, qarsylastardyń qorǵanysyn buza almady. Birinshi taım 0:5 ese­bi­men aıaqtalyp, qazaqstandyqtar ekin­shi taımda bir gol soǵyp edi. Qarymta retinde qonaqtarymyz bizdiń bir dobymyzǵa 4 doppen jaýap qaıtardy.
Norvegııa men AQSh komandalarynan basym túsken qazaqstandyq hokkeıshilerdiń baǵyn alańdaǵy tó­re­shiler de baılaǵandaı boldy. Sapasyz tóreliktiń syzy bizdiń jigit­ter­diń oıyn mánerine psıhologııalyq áser bolyp tıdi deýge negiz bar. Odan ózge, bul joly Qazaqstan qura­ma­synyń jigitteri «á» degende alǵash­qy taıaqtastasy jaqsy bolǵanymen, oıyn bastalǵan alǵashqy on mınýttan keıin tizgindi qoldan shyǵaryp aldy. Denıs Maksımenko jibergen qatelik úshin tóreshi taǵaıyndaǵan penaltıdi shved Stefan Erıkson sátti paıdalana bildi. Alǵashqy soq­qydan keıin-aq kúsh alyp ketken qarsylastar bizdiń quramanyń qaq­pasyn birinshi taımnyń sońyna deıin tek qaqyrata soǵýmen boldy.
19-shy mınýtta Erıkson ekinshi dobyn túsirip edi, endi bizdiń ji­gitter otalady dep otyrǵanda, 23-shi mınýtta Helmıýrt Qazaqstan qura­masynyń qaqpasyna taǵy bir dopty toǵytty. Buǵan deıingi oıyndarda jeńimpaz bolǵan bizdiń jigitter shvedtermen bolǵan básekede de baryn saldy. Amal joq, álem chem­pıo­nynyń aty – álem chempıony. Onyń ústine dopty hokkeıden on márte chem­pıondyq ataqty bermeı kele jat­qan tájirıbeli qarsylastyń oıyn órnegi erekshe ekendigin de moıyndaý kerek. Shvedtiń sur mergeni Anderson 28-shi mınýtta tórtinshi dopty, al Mıkelsson 42-shi mınýtta be­sinshi dopty soǵyp, birinshi taımda-aq oıyn taǵdyryn sheship tastady. Shvedter ózderine berilgen jeti múmkin­shilik – aıyp dop soǵý sátiniń beseýin óz paıdalaryna tıimdi qol­dana bildi. Odan keıingi oıynda qar­sylastar óz qaqpasyn kózdiń qara­shy­ǵyndaı qor­ǵaýǵa kóshti.
Ekinshi taımdy qarqyndy basta­ǵan shved quramasy alǵashqy mınýt­tarda-aq bizdiń qaqpaǵa eki dopty súńgitip úlgerdi. Tek bizdiń Vıacheslav Bronnıkovtyń 57-shi mınýtta soqqan jalǵyz goly qazaqstandyq hokkeıshi­ler­diń qarymta soqqy berýge qaýqar­ly ekenin kórsetti. Bronnıkov osy chem­pıonat bastalǵaly qanjyǵasyna be­sinshi goldy baılap qana qoıǵan joq, álemdik dodada bet qaratpaı júrgen áıgili komandanyń qaqpa­shy­sy Andres Svensonnyń ózin jer qaptyrdy.
Qalaı desek te, álemdik dopty hokkeı birinshiligine laıyqty da sheber quramanyń kelgenin bizdiń jigit­ter tanyta bildi.
Qanat ESKENDIR.
Almaty.