Endigi maqsat – qoladan qaǵylmaý
Keshe keshkisin bendıden Qazaqstan ulttyq quramasy Fınlıandııa komandasymen bolǵan asa jaýapty kezdesýde jeńiske jetti. Bul oıynda Alekseı Nıkıshovtyń jigitteri qarsylastaryn 10:4 esebimen utyp, Reseı, Shvesııa quramalarymen birge júldeli orynǵa talasatynyn kórsetti.
Keshe keshkisin bendıden Qazaqstan ulttyq quramasy Fınlıandııa komandasymen bolǵan asa 
jaýapty kezdesýde jeńiske jetti. Bul oıynda Alekseı Nıkıshovtyń jigitteri qarsylastaryn 10:4 esebimen utyp, Reseı, Shvesııa quramalarymen birge júldeli orynǵa talasatynyn kórsetti.
Al seısenbi kúni Shvesııa quramasynan oısyraı utylǵan qazaqstandyq dopty hokkeı quramasy kelesi kúni Reseı komandasynan da 8:6 esebimen jeńilip qaldy. Jeńilistiń ashy dámi kóńilden ketpeı turyp, reseılik hokkeıshilerden taǵy utylý kim-kimniń de eńsesin túsirgeni ras. Biraq árkim shamasyna qaraı shabady emes pe? Reseı quramasy sońǵy álem chempıonatynyń jeńimpazy ekenin umytpaǵan jón.
Bul kezdesý óte tartysty bastaldy. Alǵashqy bolyp esepti qazaqstandyq quramanyń shabýylshysy Raýan Esálıev ashty. Orys hokkeıshileri bizdiń qaqpaǵa jaýap gol soǵý úshin óte qyzý arpalys júrgizgenin, reseılikterdiń alǵashqy doby sonshalyqty qıynshylyqpen kelgenin aıtý kerek. Kóp uzatpaı qazaqstandyq shabýylshy Aleksandr Nasonov esepti ústemeledi. Artynsha, 25 mınýtta Bronnıkov 12 metrlik aıyp soqqysyn sátti oryndady. Reseılikter de qarap qalǵan joq. Birinshi taımnyń ózi-aq tym tartysty bastalyp, eki jaq teń oıynmen úziliske shyqty. Esep – 4:4.
Oıynnyń ekinshi bóligin sergek te senimdi bastaǵan Qazaqstan quramasy taǵy bir gol soǵyp, jankúıer qaýymdy bir jelpintip tastaǵan edi. Alaıda, qýanyshymyz kópke sozylmaı, reseılikter esepti jedel teńestirip qana qoımaı, ústin-ústin 3 gol soǵyp alǵa ozdy. Budan keıingi jerde jalqy golmen jaýap bergenimiz bolmasa, Reseı quramasynan 6:8 esebimen utylýǵa májbúr boldyq.
Sport jeńý ǵana emes, jeńilisten sabaq alý ekenin de eskersek, alda áli sheberlikti sarqa jumsaıtyn kezdesýler bar. Sondyqtan da el quramasynyń osy eńbeginiń ózi kóp bolyp talqyǵa salýǵa turarlyq.
Qanat ESKENDIR.
Almaty.
