Boks bıigin baǵyndyrǵan kún
Almaty qalasyndaǵy Balýan Sholaq atyndaǵy sport saraıynda Dúnıejúzilik boks serııasy boıynsha «Astana Arlans» pen ıtalııalyq «Dolce&Gabbana Milano Thunder» komandalarynyń arasynda ótken jekpe-jekte «qasqyr jigitterdiń» baǵy jandy.
Bul kúnge deıin qarsylas shydatpaǵan mılandyq qurama bizdiń jigittermen kezdesýge Ýkraına jáne Afrıka boksshylarynan quralǵan myqty toppen keldi. 53,8 kg. salmaqta alǵashqy bolyp qolǵap túıistirgen qazaqstandyq legıoner Habıbýlla Ismaıl-Ahýnov pen ýkraındyq Vıtalıı Volkov arasyndaǵy jekpe-jek óte tartysty ótkenimen, bizdiń jigitke qaraǵanda qarsylastyń sheberligi basym ekendigi anyq baıqaldy. Volkov WSB kórsetkishi boıynsha reıtıngtik 12 satyda turǵan boksshy.
Almaty qalasyndaǵy Balýan Sholaq atyndaǵy sport saraıynda Dúnıejúzilik boks serııasy boıynsha «Astana Arlans» pen ıtalııalyq «Dolce&Gabbana Milano Thunder» komandalarynyń arasynda ótken jekpe-jekte «qasqyr jigitterdiń» baǵy jandy.
Bul kúnge deıin qarsylas shydatpaǵan mılandyq qurama bizdiń jigittermen kezdesýge Ýkraına jáne Afrıka boksshylarynan quralǵan myqty toppen keldi. 53,8 kg. salmaqta alǵashqy bolyp qolǵap túıistirgen qazaqstandyq legıoner Habıbýlla Ismaıl-Ahýnov pen ýkraındyq Vıtalıı Volkov arasyndaǵy jekpe-jek óte tartysty ótkenimen, bizdiń jigitke qaraǵanda qarsylastyń sheberligi basym ekendigi anyq baıqaldy. Volkov WSB kórsetkishi boıynsha reıtıngtik 12 satyda turǵan boksshy.
Qansha jerden Habıbýlla ony buryshqa taqap soqqynyń astyna alǵanymen, mılandyq sheber naqty da saýatty soqqysymen basym túsip otyrdy. Kezdesýdiń alǵashqy jeńisine qonaqtar ıe bolǵany aıdan anyq.
Esesine, jankúıerlerdiń delebesin qozdyryp, óte áserli oıyn órnegin kórsetken Mereı Aqshalov boldy. Ol Mıklosh Varga esimdi vengr jigitimen qolǵap túıistirip, alǵashqy ketken eseni jaqsylap qaıyrdy. Aıta ketý kerek, 60 kg. salmaqtaǵy Mereı WSB kórsetkishi boıynsha reıtıngtik 12 satyda tur, sodan da bolar, qarsylasyn alǵashqy raýndtan-aq qýalap júrip tópep saldy. Esep – 1:1.
Qalyń jurtshylyq senim artyp, asa tartysty ótedi jáne jeńisti bolamyz degen úshinshi jup Qanat Islam (72,8 kg.) men Sergeı Derevıanchenko arasyndaǵy kezdesý bizdiń paıdaǵa sheshilmedi. Sheber boksshymyz Qanat bul joly sylbyr oınady. Jalpy, bul kezdesýde bizdiń jigitterdiń bári derlik sharshańqy kórinip, alǵashqy 3 raýndtan keıin qarsylasynyń ashyq ıegin kózdeı almaı júrgenderi ras-tyn. Qazaqstan quramasynyń kapıtany Qanat Islam WSB kórsetkishi boıynsha reıtıngtik 12 satyda, al onyń qarsylasy Sergeı Derevıanchenko 1 reıtıngtegi myqty boksshy. Baǵy ma, álde baby kelmedi me, áıteýir Qanat qarsylasynyń mysy basqandaı tym solǵyn bokstasty. Onyń jeńilisi jankúıer bitkenniń kóńilin túsirip qana qoımaı, mılandyqtardan taǵy da jeńilip qalamyz ba degen kúdikti kúsheıtip jiberdi.
83 kg. salmaqtaǵy Qazaqstan quramasyndaǵy aljırlik legıoner Ábdelfahıd Benshabla Mılan tobyndaǵy fransýz jigiti Lıýdovık Grogýamen kúsh synasty. Bul óte jaýapty kezdesý edi. Sondyqtan da sport saraıyna jıylǵan kórermen qulaq tundyra aıǵaılap, qazaqstandyq boksshyny arqalandyrýdan tanbady. Bar jaýapkershilikti tereń sezingen Ábdelfahıd ta baryn saldy deýge ábden bolady. Bes raýnd boıyna myqty qarsylastyń osal jerin izdep, meılinshe saıys tizginin óz qolyna alýǵa tyrysty. Onyń jigerliligi Qazaqstan qorjynyna jańa jeńis pen álemdik bıikke kóterilýge bir taban jaqyndatý múmkindigin alyp keldi.
Kezdesýdiń sońǵy juby rıng tórine kóterilgenshe jankúıerde degbir bolmady. 99 kg. salmaqtaǵy Rýslan Myrsataev pen Romarık Ngýla Tangým arasyndaǵy jekpe-jek kórer kózge qyzyq jáne el namysy tarazylanatyn sát edi. Qanattan jeńis kútip meseli qaıtqan jankúıer buǵan deıin de qysyltaıań sátterde saǵymyzdy syndyrmaǵan Rýslandy tikesinen tik turyp qarsy aldy. Mılan tobynda óner kórsetetin kamerýndyq Romarık Ngýlanyń dene bitimi men rıngtegi mysy shynynda da jeńisti shappaı suraýǵa laıyq eken. Salǵan jerden Rýslanǵa tarpa bas salǵanda zaldaǵy jurt qoljetim jerdegi jeńisten qaǵyldyq-aý degendeı, sál tiksinip-aq qalǵan.
Jankúıerdiń qoldan keler qaırany aıǵaıǵa ysqyryq qosyp óz boksshysyna dem berý ǵana. Shombal judyryqtardyń gúrs-gúrs úni men rıng syrtyndaǵy bapkerlerdiń shyryldaǵan daýysy, arýaq shaqyrysqan jurt, sońǵy úmit, bári-bári sport saraıynyń ishine syımaı jatqandaı áser qaldyrdy. Alma-kezek soqqylasyp júrip úshinshi raýndty da aıaqtady eki dáý. Ár soqqyda talaı kúsh jumsap, aýyr salmaqty kóterip júrýdiń qanshalyqty qıyn ekendigi syrt kózge de anyq sezilip turdy. Rýslanǵa qaraǵanda qarsylasy tyń kórinip, bizdiń jigittiń soqqylary darymaı jatqandaı bolǵan.
Sóıtsek, onyń bári bir mezettik sheshýshi soqqyǵa turmaıdy eken. Býradaı shabynyp kelesi shabýylǵa umtylǵan sátte Rýslannyń soqqysy Romarıkti táltirektetip jiberdi. Jurt shýlap oryndarynan qarǵyp turdy. Tóreshiniń sanaǵyna selt etpegen kamerýndyq qaıta shabýyldaı berip, taǵy bir myqty soqqyǵa tap boldy. Osy sát rıngke onyń bapkeri oramal laqtyryp, óz shákirtiniń taza jeńilgenin eriksiz moıyndady. Jeńis bizdiki!
Buǵan deıin «Dolce&Gabbana Milano Thunder» qarsylas bitkendi bet qaratpaı jeńip kelgen myqty qurama edi. Qazaqstan jaǵynyń jigitteri ekinshi oryndy ıelenip qana júrmeı, myqty qarsylasqa myqty soqqy bere alatyndyqtaryn pash etti. Endi aqpannyń aıaǵyna taman Almatyda «Astana Arlans» quramasy Úndistan boksshylarymen kezdesedi. Oǵan deıin keler aptada Máskeýde ótetin «Dınamomen» bolatyn kezdesýde el namysyn taǵy bir tarazylamaq. Qazaq elin álemge tanytyp júrgen batyrlarymyzǵa tek sáttilik tileımiz.
Qanat ESKENDIR,
Almaty.
