– Barsha qazaqstandyqtardy jáne qarjy sektorynyń búkil qyzmetkerlerin tól teńgemizdiń 25 jyldyǵymen quttyqtaımyn. Kúrdeli kezeńderdi eńserdik. Teńgeni engizý arqyly Qazaqstannyń qarjylyq táýelsizdigine jol ashtyq. Qazir biz damýdyń jańa kezeńine qadam bastyq, – dedi Memleket basshysy.
Ulttyq bank tóraǵasy Qazaqstan Prezıdentine valıýta-qarjy naryǵyndaǵy qazirgi ahýal men elimizdiń ekonomıkalyq damýynyń negizgi kórsetkishteri týraly málimdedi.
– 2018 jylǵy qazan aıynda ınflıasııa sońǵy 3 jyldaǵy eń tómengi 5,3 paıyz deńgeıinde boldy. Jyl basynan bergi ınflıasııa 3,7 paıyzdy qurady. Bizdiń 2018 jylǵa jasaǵan boljamymyz boıynsha onyń deńgeıi 5-ten 7 paıyzǵa deıingi aralyqta bolady, – dedi D.Aqyshev.
Ulttyq bank tóraǵasy Memleket basshysyna ınflıasııanyń qazirgi deńgeıine yqpal ete alatyn negizgi faktorlar jóninde aıtty.
– Birinshiden, bul – ekonomıkadaǵy ınflıasııalyq qalypty saqtaý. Biz baǵanyń ósýine jol bermeý úshin Úkimetpen birlese jumys istep jatyrmyz. Baǵanyń sýbektıvti faktorlardyń yqpalymen ózgerip otyrǵan naryqtardy anyqtaý úshin belsendi jumys júrgizilýde. Ekinshi faktor – bizdiń saýda salasyndaǵy seriktesterimiz sanalatyn elderdegi ahýal, – dedi D.Aqyshev.
Sonymen qatar, Qazaqstan Prezıdentine ulttyq valıýta baǵamy tóńiregindegi jaǵdaı jóninde málimdeldi. Ulttyq bank tóraǵasynyń aqparatyna sáıkes, qýat kózderiniń qazirgi ýaqyttaǵy quny qalypty, bul aıyrbas baǵamynyń turaqtylyǵyn qamtamasyz etýge múmkindik beredi.
D.Aqyshev elimizdiń altyn-valıýta rezerviniń ahýaly týraly baıandady. Atap aıtqanda, qazan aıynyń sońyna qaraı altyn-valıýta rezerviniń kólemi 29 mıllıard AQSh dollaryna jetti. Al, ulttyq qordyń sheteldik valıýtadaǵy aktıvteri 57 mıllıard AQSh dollaryna jýyqtady.
Kezdesý sońynda Nursultan Nazarbaev birqatar naqty tapsyrma berdi.
